C-SUV сегментот и понатаму е еден од најважните на европскиот пазар, а податоците на „Dataforce“ за март 2026 година покажуваат дека купувачите најмногу им веруваат на добро познатите имиња. Сепак, меѓу десетте најпродавани модели се проби и еден кинески автомобил – „Jaecoo 7“.
Во март убедливо најпродаван C-SUV во Европа бил „Nissan Qashqai“, со дури 27.832 регистрирани примероци. Со тоа далеку зад себе ги оставил „Volkswagen Tiguan“, кој завршил на второто место со 19.130 примероци, како и „Volkswagen T-Roc“, трет со 19.027 регистрации.
Зад двоецот на „Volkswagen“ се пласирале „Kia Sportage“ со 18.848 продадени примероци, „Hyundai Tucson“ со 18.261, „Toyota C-HR“ со 14.723 и „Peugeot 3008“ со 13.457 регистрации.
Особено интересен е осмиот најпродаван модел во март – „Jaecoo 7“. Кинескиот SUV остварил 12.758 регистрации и е единствениот кинески модел меѓу десетте најпродавани C-SUV возила во Европа. Зад него останале „Škoda Elroq“ со 11.439 и „Ford Kuga“ со 11.049 примероци.
„Qashqai“ води и по првиот квартал
„Nissan Qashqai“ е на врвот и кога се гледаат првите три месеци од 2026 година. Од 1 јануари до 31 март биле продадени 49.748 примероци од „Qashqai“, со што го задржал првото место пред „Volkswagen T-Roc“ со 47.156 и „Tiguan“ со 47.045 примероци.
Четврта е „Kia Sportage“ со 42.100 регистрации, петта „Hyundai Tucson“ со 39.432, а шести „Peugeot 3008“ со 34.763 продадени примероци.
Следуваат „Toyota C-HR“, „Škoda Elroq“, „Ford Kuga“ и „Jaecoo 7“, кој со 22.574 регистрации во првиот квартал веќе успеал да се приближи до најсилните европски конкуренти.
