Иако редизајнираниот модел ќе донесе одредени доработки на надворешниот изглед и поефикасни погонски опции, овојпат фокусот е ставен на технологијата, удобноста и дигиталното искуство на патниците.

Новата „Серија 7“ така би требало да стане уште полуксузен и технолошки понапреден автомобил, со ентериер кој повеќе потсетува на модерен lounge-простор или канцеларија на тркала отколку на класична лимузина.

Кокпит без класични инструменти

Најголемата новина во кабината е новиот систем „Panoramic iDrive“. „BMW“ се откажува од класичната инструмент-табла и воведува проекција на информации преку долниот дел од ветробранското стакло.

Системот наречен „Panoramic Vision“ прикажува податоци за возењето и други информации во видното поле на возачот, без потреба да го тргне погледот од патот. Покрај тоа, доаѓа и нова генерација на тродимензионален „head-up“ дисплеј.

Редизајнираниот модел користи и нов „BMW Operating System X“, оперативен систем базиран на „Android“ архитектура. Системот носи поголема компјутерска моќ, побрза работа и поголеми можности за прилагодување на корисничкиот интерфејс.

Екран и за совозачот

Во внатрешноста сега се наоѓа и нов 14,6-инчен екран за совозачот, наменет за мултимедија и забавни содржини за време на возењето.

Системот автоматски го затемнува приказот за содржината да не му пречи на возачот.

Волна, кашмир и прилагодливо осветлување

„BMW“ дополнително го нагласува премиум карактерот на моделот преку употреба на полуксузни материјали. Ентериерот комбинира висококвалитетна кожа со детали од волна и кашмир, додека купувачите можат да избираат помеѓу украси од природно дрво или карбонски влакна.

Голема улога има и амбиенталното осветлување кое може целосно да се прилагоди на желбите на патниците и условите за возење.

Задните седишта го претвораат автомобилот во дневна соба

Посебно внимание е посветено на задниот дел од кабината, каде што сопственикот најчесто и се наоѓа. Задните седишта можат да се навалат речиси до лежечка положба, со што дополнително се нагласува луксузната и релаксирачка атмосфера.

Еден од главните адути останува опционалниот 31,3-инчен „Theatre Screen“ со 8K резолуција, кој се спушта од покривот. Патниците на задните седишта можат да стримуваат содржини, да поврзат гејминг конзоли или да извршуваат видеоповици.

Багажникот, зависно од изведбата, нуди меѓу 500 и 540 литри простор.

Во Германија цените започнуваат од 117.900 евра за „BMW 740 xDrive“, додека електричниот „BMW i7“ стартува од 121.400 евра. На врвот од понудата се наоѓа „i7 M70 xDrive“, чија цена достигнува 182.400 евра.