Додека поголемиот дел од Европската унија постепено се оддалечува од американскиот претседател Доналд Трамп, Политико пишува дека Грција оди во спротивна насока и сè поотворено гради политички и економски врски со круговите блиски до движењето МАГА (Make America Great Again – Да ја направиме Америка повторно голема).
Американската амбасадорка во Атина, Кимберли Гилфојл, ја поттикнала идејата Трамп ова лето да одржи говор на Акропол по повод 250-годишнината од американската независност. „Сите би го сакале тоа, нели?“, порачала таа, според наводите на авторите. Грчкиот премиер Киријакос Мицотакис истовремено ги нагласува историските врски меѓу двете земји, истакнувајќи ја улогата на грчките мислители во обликувањето на американските основачки идеи, додека на Трамп му нуди „топло добредојде“ во случај на посета. Трамп, од друга страна, ја опишува Грција како „фантастична“, а Мицотакис како „одличен тип“, во момент кога неговите односи со дел од европските лидери дополнително се комплицираат.
За Мицотакис, посетата на Трамп значи многу повеќе од обична слика во јавноста. Грчката влада ги гледа Соединетите Американски Држави – со нивната голема поморска база на Крит – како краен гарант на безбедноста од турска инвазија и сака да ја осуети повремената „романса“ меѓу Трамп и турскиот претседател Реџеп Таип Ердоган.
Затоа Грција вложува многу во Америка и преку деловни договори, склучувајќи историски енергетски спогодби и обезбедувајќи големи американски инвестиции во пристаништа. Овие воени и комерцијални врски меѓу Вашингтон и Атина се поткрепени и со сè посилно идеолошко усогласување, додека конзервативната партија на Мицотакис, Нова демократија, се поместува уште подесно. Тоа значи дека Нова демократија ја нагласува својата строга линија кон миграцијата и теми блиски до движењето МАГА, како христијанството, грчката цивилизација и европскиот идентитет. Високи функционери на партијата и грчки обожаватели на Трамп го користат својот момент, дружејќи се со функционери на МАГА, кои сега редовно дефилираат низ Грција.
Од своето доаѓање кон крајот на минатата година, Гилфојл привлече огромно медиумско внимание со гламурозни фотосесии, гостувања во телевизиски емисии и свечени гала-настани. Поранешната водителка на „Фокс њуз“ и обвинителка, која била во брак со гувернерот на Калифорнија, Гевин Њусом и била во врска со Доналд Трамп Помладиот, уште од самиот почеток покажа дека акцентот ќе го стави на силните економски врски.
Во текот на нејзината прва недела на функцијата, Грција потпиша договор со американскиот енергетски гигант „ЕксонМобил“ за почеток на подморско дупчење – прв таков проект во земјата по повеќе од 40 години.
Неколку дена подоцна, Атина и Киев склучија договор за увоз на американски течен природен гас (ЛНГ) за да ѝ помогнат на Украина во зимските потреби, со што Грција стана првата земја од ЕУ што учествува во напорите на Вашингтон да ја замени „секоја последна молекула руски гас“ со американски ЛНГ.
Во своето прво интервју во Грција ја налутила Кина, нарекувајќи ја нејзината сопственост над пристаништето Пиреја „несреќна“ и предложила тоа да се „реши“ – сугерирајќи потенцијална продажба.
Грчката влада брзо ги забрза плановите за ново пристаниште со американска поддршка во Елефсина, близу Атина. Опозицијата го осуди тој потег како нетранспарентен и политички мотивиран, додека аналитичарите рекоа дека создавањето ново големо пристаниште, оддалечено само дваесетина километри од Пиреја, не е финансиски ниту еколошки одржливо.
„Секој ден кога ќе се разбудам, ќе барам начин да ги протуркам американските интереси, пари и инфраструктура, да соработувам со Грција и со остатокот од нашите сојузници во овој регион, а тоа значи многу агресивно сузбивање на кинеските интереси“, рекла Гилфојл претходно оваа година.
Клучно е тоа што таа ги опишала и своите блиски врски со владини функционери, напомнувајќи дека со Мицотакис отворено разговара три до четири пати неделно.
„Му испраќам порака и разговараме по телефон. Тој навистина ги поддржува САД и сака тоа да го докаже“, изјавила таа.
Додала и дека секојдневно разговара со други министри, кои секогаш одговараат на нејзините повици.
„Не е важно дали е викенд; ако се договориме да се најдеме кај мене дома, тие се појавуваат“, истакнала Гилфојл.
Годишниот економски форум во Делфи стана главно собиралиште за фигури од движењето МАГА и влијателни личности. Меѓу оние кои кон крајот на април допатувале на падините на планината Парнас биле: американскиот амбасадор при ЕУ, Ендрју Пуздер, Христос Марафатсос од лобистичката група „Грци за Трамп“, Пол Данс, архитектот на „Проект 2025“, и Скот Атлас, советник на Трамп за време на пандемијата.
„Грција се наметна како еден од најголемите сојузници на Соединетите Држави во вториот мандат на претседателот Трамп“, изјавил Метју Бојл од десничарската платформа „Брајтбарт“, кој станал редовен гостин на грчките панели.
Иако Мицотакис отсекогаш поддржувал силни врски со САД, по победата на Трамп грчкиот конзервативен табор мораше да побрза за да се усогласи со новата администрација.
Опозицијата го критикуваше поради претходно перципираната блискост со Камала Харис, нарекувајќи го „непожелен“ кај Трамп. Тоа ги поттикна министрите од Нова демократија да започнат сопствена офанзива во стилот на МАГА.
Министерот за здравство Адонис Георгиадис, кого опозицијата го нарекува „имитатор на Трамп“, повеќепати ја фалел политиката на американскиот претседател, а министерот за миграција Танос Плеврис рекол дека американските гласачи гласале против „воук“ агендата.
Се чини дека брзиот пресврт на Мицотакис кон Трамп се исплаќа, особено ако дојде до најавената посета. Во неодамнешно интервју за „Брајтбарт“, Мицотакис ветил дека Трамп во Грција ќе се чувствува како дома:
„Грците многу се гордеат со своето гостопримство“, истакнал тој.
