Том и Маура, кои на Инстаграм објавуваат под името @expeditionsomeday, во кратко видео покажале како нивните планови многу брзо почнале да се распаѓаат.

Реалноста потешка отколку што мислеле

Во видеото најпрво покажаа што очекувале: „Ние пред два месеци: ‘Ќе дадеме отказ и ќе станеме травел инфлуенсери, ќе патуваме полно работно време.’“

Но брзо стигнало и отрезнувањето: „Сега сме невработени и ги трошиме заштедите. Добивме само 2000 нови следбеници, а нè чекаат уште 14 земји.“

Иако индустријата на инфлуенсерски маркетинг на глобално ниво вреди десетици милијарди, конкуренцијата е жестока. Податоците покажуваат дека поголемиот дел од соработките со брендови и понатаму одат кај креатори со голем број следбеници, додека помалите профили тешко заработуваат. Експертите истакнуваат дека растот може да биде бавен, особено во заситени гранки како патувањата, каде што секој ден се појавуваат илјадници нови креатори.

Искреноста им донела поддршка

И покрај финансиските проблеми, искреноста на Том и Маура наиде на поддршка од публиката, а многумина во коментарите се препознаа во нивната приказна. Парот видеото го опишал со зборовите: „Уште една година.“

Една корисничка напишала: „Навивам за вас, затоа што тоа е и мој сон!!“, додека друга додала: „Истата работа! Буквално истата ситуација, само без следбеници... хаха, но сепак тоа е животен сон.“

Некои споделиле и слични искуства. „Го правиме истото, но со три деца од 3, 4 и 8 години, сигурен сум дека нашите заштеди ќе се потрошат уште побрзо“, напишал еден родител. Други потсетиле дека таков пат сепак на некои им успева: „Ние заминавме пред две години и сè уште патуваме.“

Еден корисник им дал поддршка, но и доза реализам: „Да се биде травел инфлуенсер и онака е преценето. Уживајте во патувањето, со следбеници или без нив.“

Патувањето сепак продолжува

Поддршка им пристигнувала од сите страни. „Токму сега добивте нов следбеник. Само продолжете така!“, им порачал еден корисник.

За Том и Маура патувањето, и покрај сè, продолжува. Иако на почетокот растел бавно, бројот на нивните следбеници во меѓувреме надминал 7500. Според нивната страница, парот моментално го истражува Џајпур, живописен град во Индија.