Поп-културата беше на врвот, речиси никој немаше мобилен телефон, а интернетот, иако достапен, не постоеше во секој миг од нашиот живот. Сепак, миленијалците и генерацијата Алфа на крајот и не се толку различни. Деведесеттите повторно се вратија во мода, а во духот на таа носталгија, порталот „Parents.com“ носи неколку совети што родителите кои пораснале во деведесеттите можат да им ги дадат на денешните деца.

Трпението е доблест

Денес речиси сè е достапно за само неколку минути: омилената серија, играчките нарачани преку интернет или вечерата што ја носат доставувачите. Но, децата од 90-тите, кои не можеа едноставно да пуштат епизода од омилената серија кога и да посакаат, туку мораа да ја следат телевизиската програма, знаат дека магијата понекогаш лежи токму во исчекувањето.

Досадата може да биде добра работа

Во деведесеттите, златното доба на dial-up интернетот, не можеше со часови бесцелно да се сурфа – родителите понекогаш мораа да упатат телефонски повик. Пораката до денешните деца е: оставете ги екраните и видете што ќе се случи кога ќе си дозволите малку досада.

Излезете надвор и пронајдете другар за игра, земете боички и цртајте или со браќата и сестрите измислете некоја нова игра во дворот. За многу деца од 90-тите, часовите во кои навидум „немаа што да прават“ се претвораа во најзабавните и најкреативните моменти од детството.

Сите имаме несмасна фаза

Во времето на социјалните мрежи може да изгледа дека денешните тинејџери едноставно и без напор минуваат низ растењето. Но, луѓето што растеа во деведесеттите и кои за училишните фотографии се насмевнуваа со протези на забите, огромни очила или неуспешна фризура знаат дека еден ден со насмевка ќе се навратат на таа своја „несмасна фаза“ и ќе сфатат дека всушност биле симпатични.

Тамагочи ве учи на одговорност

Џебните миленичиња Тамагочи неодамна повторно се вратија во мода, а со нив и потсетникот дека тоа не се играчки на кои можете едноставно да заборавите. Ако го занемарите својот Тамагочи, заборавите да го исчистите неговиот неред или да го нахраните, тој гласно ќе ве предупреди на тоа.

Не мора секој момент да стане вирален

Нема ништо поубаво од дружење со најдобрите пријатели или со семејството, игра на отворено, испробување нова видеоигра или смеење со забавен филм. Гледањето популарни серии на пижама-забава, организирањето концерти за родителите или возењето велосипед низ маалото со пријателите се само некои од спомените од детството што најмногу се ценат. Не мора секој момент да биде снимен и објавен на ТикТок за засекогаш да остане во срцето.