Микро-станот, познат како „гошивон“ е практично еднокреветна соба со кревет, маса и стол, како и мал фрижидер и бања со туш и тоалет. Просторот е толку тесен што Лидија мора да поместува работи секој пат кога треба да користи тоалет или кога сака да се истушира.

Креаторката на содржини, која се преселила во Јужна Кореја пред повеќе од две години, редовно споделува на социјалните мрежи каков изгледа животот во нејзиниот „мал дом“. Таа вели дека плаќа околу 300 евра месечно за она што го опишува како најмалиот стан во кој некогаш живеела.

Нејзината облека виси од креветот бидејќи нема место за плакар, а на подот речиси и да нема слободен простор. Станот дури и нема кујна, па Лидија ја дели кујната и пералната со другите станари на катот.

Снимајќи се себеси во својата соба, таа се пошегува: „Кога ѓаволот не можеше да ме смести на друго место, ме смести во стан од 6,5 квадратни метри“. И покрај сè, Лидија вели дека минималистичкиот начин на живот ѝ одговара.

Потоа покажа нешто што го нарекува бања во облик на „стаклена кутија“, каде што тоалетот и тушот се практично поврзани со мијалникот. „Секој пат кога се туширам, морам да извадам сè што не сакам да се намокри или што не треба да се намокри, како тоалетна хартија и пешкир“, објасни таа. „Секако, ги вадам и алиштата, а кога ќе завршам, сè враќам назад и тоа е тоа“, додаде таа.

„Ова не е стан, ова е плакар“

Нејзиното видео на ТикТок, објавено под корисничкото име „@lydyagami“, стана вирално и собра 1,4 милиони прегледи. Многумина беа воодушевени од просторот за живеење на Лидија, но и коментираа за цената на киријата.

„Девојко, се надевам дека киријата ти е евтина“, напишал еден корисник, а откако открила во коментарите дека месечниот наем е 300 евра, друг напишал: „За таа цена, добивам неколку пространи соби“.

„Се задушувам само гледајќи го тоа“, коментирал друг корисник. „Девојко, ова не е стан, ова е плакар!“ додал друг. Трет коментирал: „О, не… никако“. Сепак, имаше и поинакви реакции. „Ова е подобро отколку да имам цимер“, напишал еден корисник. Лидија се согласила, одговарајќи: „100 проценти“.