Вила од 19-ти век, која се наоѓа во центарот на Белград, можеби изгледа дотраено, но во неа се одвива театарска магија. Таа е претворена во театарот „Таковска17“ и привлекува бројни посетители.
Изградена во 1894 година за едно угледно белградско семејство, куќата на улицата Таковска 17 е внесена на листата на заштитено културно наследство. Сместена е спроти зградата на Радио-телевизија Србија (РТС).
Кога ќе зачекорите внатре, лесно би можеле да помислите дека е зимско попладне во 1926 година. Неколку локални театарски трупи во „Таковска17“ го пронашле својот дом, претставувајќи претстави од почетокот на 20-иот век пред публика од само неколку десетици луѓе.
„Оваа куќа стана вистински мал театар со свој репертоар“, изјавила Исидора Ристиќ, која глуми во забавна криминалистичка приказна со аматерската театарска трупа „Артисти“, додавајќи дека таа всушност станала лик во нивните претстави.
Архитектката Тамара Масиќ, исто така членка на трупата, рекла дека е среќна што старата куќа опстанала во својот изворен облик.
Актерите, како што вели таа, имале чест да ѝ вдахнат нов живот оваа градба и да ѝ дадат нов сјај.
Автентичната атмосфера на епохата и интимното окружување се покажале толку успешни што за влезници често има и листа на чекање. Внатре боите на ѕидовите со годините избледеле, а многу украси едвај се распознаваат. Дрвените подни даски носат длабоки траги од повеќе од еден век употреба, додека поголемиот дел од декорацијата потекнува од раниот 20. век.
„Куќата навистина изгледа како музеј“, рекла Масиќ. На други локации во Белград, инвеститорите срушиле десетици слични куќи, бришејќи цели станбени квартови и заменувајќи ги со повеќекатници. Но, „Таковска17“ „одбива да си замине“.
„Тука е од 1894 година, горда, со мирис на старо дрво и нови приказни“, стои на нивната веб-страница.
