Младата и талентирана пејачка Мими искрено зборува за својата љубов кон музиката, животниот пресврт по „Ѕвездите на Гранд“, емоцијата што ја носи во секоја песна и вредностите што ја водат и на сцена и приватно. Во интервју полно искреност, таа открива што ја инспирира, што ѝ е приоритет и што можеме да очекуваме од неа во иднина.
❓Како започна твојата музичка приказна и кога сфати дека тоа е патот по кој сакаш да одиш?
✨Музиката е дел од мене уште од најмали нозе. Од дете чувствував дека тоа е нешто што природно ми доаѓа, настапував на разни музички шоуа и желбата никогаш не згасна. Љубовта кон музиката ја носам од мала, а и во моето семејство отсекогаш имало музикалност, па некако тој пат ми беше суден.
❓Што најмногу те инспирира кога создаваш музика?
✨Јас лично не ја создавам музиката, но многу добро знам што ми лежи и што чувствувам како свое. Кога ќе ја слушнам песната првпат, веднаш знам дали е тоа дали можам да се пронајдам и да ја пренесам емоцијата на вистински начин.
❓Како би го опишала твојот музички стил со неколку зборови?
✨Не сакам да се ограничувам. Сакам и поп и народна музика, се што има душа и што можам искрено да го отпеам. За мене најважно е песната да допре, без разлика на жанрот.
❓Колку од тебе и твоите лични искуства има во песните што ги пееш?
✨Не секогаш песните се директно мои лични приказни, но емоцијата секогаш е вистинска. Дури и кога немам исто искуство, се трудам да ја почувствувам приказната и да ја пренесам како да е моја, затоа што публиката ја чувствува искреноста.
❓Каква е Мими кога не е на сцена и пред камера?
✨Навистина се трудам да бидам иста и на сцена и приватно. Едноставна, искрена, емотивна и семејно ориентирана. Не глумам ништо, тоа што сум јас, тоа го добива и публиката.
❓Кој момент досега ти е најдраг во твојата кариера?
✨Учество во „Ѕвездите на Гранд“ дефинитивно. Искрено, преку ноќ ми се смени животот. По тој настап конечно го добив вниманието за сето она што го работев и градев целиот живот, и тоа е момент што никогаш нема да го заборавам.
❓Свесна ли си колку внимание привлекуваш кај публиката и како се справуваш со тоа?
✨Свесна сум и навистина ми е драго. Тоа внимание ме прави среќна, но и благодарна. Секогаш се трудам да останам приземна и да не заборавам зошто сум почнала..од љубов кон музиката.
❓Што кај една личност веднаш може да те освои, а што веднаш да те одбие?
✨Ме освојуваат искреност, почит и топлина. А ме одбиваат неискреност, ароганција и лоша енергија. Верувам дека човекот најмногу се чувствува преку однесувањето, не преку зборовите.
❓Дали моментално музиката е приоритет или љубовта има свое место во твојот живот?
✨Семејството ми е секогаш на прво место. Но музиката е мојата најголема љубов и нешто без кое не можам да се замислам. Среќна сум кога успевам да ги балансирам и двете.
❓Што можеме да очекуваме од тебе во блиска иднина – нова музика, проекти?
✨Секојдневно работиме, вложуваме и создаваме. Се надевам дека публиката ќе има можност да слушне уште многу нови песни и да види повеќе проекти што ги подготвуваме со голема љубов.
❓Која женска личност од историските влијателни ти оставила најголем впечаток и зошто?
✨Тина Тарнер, поради нејзината сила, животна приказна и влијанието што го има оставено преку музиката.
