Китовите убијци и делфините за првпат се снимени како заедно ловат лосос во длабоките води. Со помош на дронови и минијатурни камери, канадските научници го открија постоењето на „стратешки сојуз“ меѓу двата вида, а сите детали се објавени во угледното списание „Scientific Reports“.
Прв доказ
Истражувањето покажало дека делфините се исклучително вешти во пронаоѓање на големите кралски лососи (Oncorhynchus tshawytscha), но не можат да ги проголтаат цели.
Тогаш на сцена стапуваат орките, кои ги следат делфините до пленот, а потоа им ги оставаат „остатоците“ со кои тие можат да се нахранат.
Scientists tracking the behavior of nine northern resident orcas off the coast of British Columbia observed the killer whales seemingly coordinating with Pacific white-sided dolphins to hunt salmon. https://t.co/xuX8aMDVrf pic.twitter.com/YrX9BbxCvZ
— The Washington Post (@washingtonpost) December 11, 2025
Научниците забележале 258 различни случаи во кои делфините се движеле во близина на китови убијци во водите околу островот Ванкувер во текот на 2020 година. Станува збор за прв доказ дека овие два вида ловат заедно, пренесува „Jutarnji“.
Предностите на новите технологии
„Сите буквално останавме без зборови. Беше неверојатно возбудливо, бидејќи китовите убијци се меѓу најистражените морски животни – нивната исхрана, подрачјата на исхрана и популациите се добро познати. Но, секогаш кога применуваме нови технологии кои ги поместуваат границите на достапните податоци, доаѓаме до нови сознанија“, изјави д-р Сара Форчун од Универзитетот Далхаузи во Нова Шкотска.
Таа истакнува дека одамна се знаело дека орките стапуваат во контакт со пацифичките делфини, но набљудувањето на нивните заеднички нуркања и усогласениот лов целосно го менува сфаќањето на тие средби.
Нејзиниот колега, д-р Ендрју Трајтс од Универзитетот Британска Колумбија, додава дека китовите убијци ги користат делфините како „извидници опремени со радари“.
„Ситуација во која сите добиваат“
„Стратешкото сојузништво кое го воочивме навистина е извонредно. Со заедничко делување, китовите убијци штедат енергија и ги користат делфините како своевидни извидници, со што ги зголемуваат шансите за пронаоѓање плен на поголеми длабочини. За возврат, делфините добиваат заштита од грабливци и пристап до остатоците од една од најценетите риби во океанот. Тоа е ситуација во која сите добиваат“, објасни тој.
Првиот што го забележал заедничкиот лов бил Кит Холм, пилот на дронови во научниот институт Хакаи.
„Од воздух можеше да се види неверојатната количина на активност. Беше јасно дека се одвива некаква комуникација и дека активно ловат заедно“, рече тој.
