Познатиот режисер во еден поткаст зборуваше за своите омилени филмови, а притоа откри кој актер воопшто не му се допаднал.
Режисерот Квентин Тарантино откри кој, според неговото мислење, е најлошиот актер во Холивуд. Авторот на филмови како „Pulp Fiction“ и „Kill Bill“ гостуваше во поткастот „The Bret Easton Ellis Podcast“ и сподели листа на своите омилени филмови.
Тарантино рече дека култниот филм „There Will Be Blood“ сакал да го смести над петтото место на листата, но не можел, бидејќи во него Пол Дејно ги игра близнаците Пол и Ели Сандеј. Тарантино ја спореди изведбата на Пол со онаа на Даниел Деј-Луис и го нарече актерот „слаб“.
„‘There Will Be Blood‘ ќе имаше добра шанса за прво или второ место ако немаше голема, огромна маана. Таа маана е Пол Дејно. Очигледно требаше да биде двојна улога, но исто така е очигледно дека не е. Дејно е слаб. Остин Батлер би бил прекрасен во таа улога. Дејно е толку слаб и неинтересен тип“, изјави тој остро.
Неговата изјава за Пол предизвика многу негативни коментари на социјалните мрежи. „Ова е луда забелешка“, „Мора да постои некаков чуден конфликт зад сцената. Инаку, Тарантино е буквално најлошиот актер што сум го видел, можеби се обидува да ја пренесе таа титула на некој друг“, се некои од коментарите.
Режисерот во поткастот ги откри своите 10 омилени филмови на 21-от век. На прво место го стави „Black Hawk Down“ од 2001 година, во режија на Ридли Скoт. „Ми се допадна кога првпат го гледав, но мислам дека беше толку интензивен што престана да делува врз мене, не го понесов со себе на начинот на кој требаше“, рече тој. Филмот го погледнал уште неколку пати, а сега го нарече „ремек-дело“.
„Ова е единствениот филм што навистина оди во насока на ‘Apocalypse Now‘ кога станува збор за целта, визуелниот ефект и чувството, и мислам дека тоа го постигнува. Го одржува интензитетот 2 часа и 45 минути, или колку што трае, неодамна го гледав повторно, срцето ми биеше за време на целиот филм: целосно ме обзеде и не ме остави, а не сум го гледал подолго време“, истакна тој.
На второто место на листата се најде анимираниот филм „Toy Story 3“, во режија на Ли Ункрих, кој Тарантино го смета за „речиси совршен филм“. „Последните пет минути ми го исчупаа срцето, ако воопшто се обидам да го опишам крајот, ќе се расплачам“, рече тој.
Третото место го зазеде филмот на Софија Копола „Lost in Translation“. Четврти на листата на Тарантино е филмот на Кристофер Нолан „Dunkirk“, а петти „There Will Be Blood“. На листата се најдоа и „Zodiac“ на Дејвид Финчер, „Unstoppable“ на Тони Скoт, „Mad Max: Fury Road“ на Џорџ Милер, „Shaun of the Dead“ на Едгар Рајт и „Midnight in Paris“ на Вуди Ален.
