Претставувањето на "ChatGPT" пред три години ја шокираше целата технолошка индустрија, а најмногу неподготвени изгледа останаа во „Google“. Таа компанија со години доминираше на пазарот на интернет-пребарување и, благодарение на огласите што ги прикажува покрај резултатите на пребарувачот, остваруваше огромни приходи. Но со појавата на AI-четботот ситуацијата драматично се промени: наместо да „гуглаат“, луѓето започнаа да разговараат со вештачка интелигенција и од неа да бараат одговори на своите прашања.

Тоа значи дека корисниците сè помалку пребаруваат, а и поретко ги посетуваат веб-страниците кон кои порано ги насочуваше „Google“, што влијаело врз целиот бизнис-модел заснован на интернет-пребарувањето.

Токму поради тоа, „Google“ веднаш по објавата на ChatGPT го вклучи алармот — беа свесни во која насока се движи индустријата и мораа да реагираат, ставајќи го целиот фокус на AI. Во почетокот брзаа и правеа груби грешки, поради што беа изложени на критики, па дури и на исмејување.

Скокот е неверојатен

Со тек на време нивните модели стануваа сè подобри, а колкав напредок постигнале може да се види преку неодамнешната изјава на директорот на „Salesforce“, Марк Бениоф. Тој со години секојдневно го користел "ChatGPT", но по само два часа со најновиот модел „Gemini 3“ изјавил дека нема намера да се врати на алатките на Алтман. Скокот е неверојатен, објаснил тој.

За тој напредок добро знаат и во „OpenAI“, а последниот потег на Алтман покажува дека ситуацијата драстично се променила. Имено, во интерен допис до вработените Алтман активирал „црвен код“ во компанијата поради сè посилната и опасна конкуренција на "ChatGPT". За да останат во чекор со противниците како „Gemini“, неопходно е значително да се подобри квалитетот на "ChatGPT", предупредил тој.

Интересно е што Алтман јавно му честиташе на „Google“ за одличниот модел, но зад затворени врати покажал загриженост и истакнал дека ги очекува многу работа доколку сакаат брзо да ги стигнат конкурентите.

Сè е насочено кон "ChatGPT"

Првиот човек задолжен за развојот на "ChatGPT" во „OpenAI“, Ник Турли, оваа недела коментираше дека секоја недела се појавуваат нови AI алатки — што, според него, е одлично, бидејќи ги мотивира и нив да го забрзаат развојот и да ја подигнат скалата за тоа што AI-асистентите можат да направат. И покрај конкуренцијата, подвлече тој, "ChatGPT" и понатаму е водечкиот AI-асистент во светот.

Алтман и неговиот тим сега мораат да се потрудат тоа да остане така, бидејќи тешко е да се поверува дека корисниците ќе останат приврзани за еден четбот (освен оние со претплати), ако на пазарот постојат подобри решенија. Токму затоа од компанијата нагласуваат дека нивниот фокус е да го направат "ChatGPT" уште поинтуитивен, уште помоќен и да продолжат со растечка глобална експанзија.