Во новиот промотивен материјал е прикажана сцена што секој обожавател на Бетмен веднаш ќе ја препознае: преземањето на музејот во Готам Сити од страна на Џокер. Станува збор за верна „LEGO“ рекреација на легендарната секвенца од филмот "Batman" на Тим Бартон од 1989 година, во која Џокер, кого тогаш маестрално го толкуваше Џек Николсон, со својата банда уништува уметнички дела додека танцува на музиката на Принс. Во видеото се гледа „LEGO“ Џокер и неговите приврзаници како на комичен и хаотичен начин ги уништуваат експонатите, шараат по сликите и танцуваат низ галеријата, што предизвика воодушевување и бран носталгија меѓу следбениците.

„Во овој нов филмски исечок, ’LEGO Batman: Legacy of the Dark Knight‘ ја рекреира култната секвенца видена во филмот ’Batman‘ (1989) во која Џокер го презема музејот во Готам Сити. Изградете го наследството кога играта ќе излезе на 29 мај!“, стои во описот на објавата, со што се потврдува датумот на излегување што фановите со нетрпение го очекуваат.

Реакциите на фановите не стивнуваат

Објавата веднаш привлече огромно внимание, а реакциите на публиката беа исклучително позитивни, при што многумина истакнаа колку видеото ги воодушевило. „Мислам дека последен пат бев вака возбуден за игра за ’Cyberpunk‘“, напиша еден корисник, додека друг го објасни концептот на претстојната игра: „’Legacy of the Dark Knight‘ буквално е прераскажување на целата приказна за Бетмен до одредена точка, но ја користи целокупната историја на ликот (стрипови, филмови, ТВ серии, други видеоигри итн.) како инспирација за таа приказна. Во суштина, тоа е една голема прослава на Бетмен“. Се чини дека новата „LEGO“ авантура ќе понуди подлабок и поавтентичен поглед на светот на Готам Сити, спојувајќи го препознатливиот хумор со почит кон богатата историја на Витезот на темнината.

Овој краток, но ефектен видео-клип послужи како совршена најава и потсетник зошто „LEGO“ игрите со суперхеројска тематика се толку популарни. Со комбинација од носталгија, акција и хумор, „LEGO Batman: Legacy of the Dark Knight“ веќе сега се позиционира како еден од насловите што оваа пролет ќе се очекуваат со најголемо нетрпение.