Нов онлајн-движење ги повикува корисниците да ја откажат претплатата на „ChatGPT“ поради контроверзното ново партнерство меѓу „OpenAI“ и американското Министерство за одбрана.

Договорот овозможува моделите на компанијата да бидат распоредени во рамки на тајни владини мрежи, што предизвика негативни реакции на социјалните мрежи и во технолошките заедници.

Компанијата „Anthropic“ одби да прифати слични услови од Пентагон, наведувајќи загриженост околу масовниот надзор и автономното оружје. Со одбивањето да ги ублажи заштитните мерки, компанијата ризикуваше да изгуби голем државен договор, поради што доби пофалби од критичарите на воената употреба на вештачката интелигенција.

Набргу потоа се појави движењето „Cancel ChatGPT“. Дел од корисниците ја откажуваат претплатата како знак на протест, обвинувајќи го „OpenAI“ дека ги компромитирал етичките принципи преку соработката со војската. Суштинската расправа, сепак, не е само за една компанија, туку за воената примена на вештачката интелигенција воопшто.

Негативните реакции не се ограничени на конкретниот договор, туку ја отсликуваат пошироката и растечка напнатост околу тоа како вештачката интелигенција треба да се користи во одбраната, разузнавањето и надзорот.

Поделби меѓу вработените

„OpenAI“ тврди дека договорот со Пентагон вклучува заштитни механизми што забрануваат домашен масовен надзор, автономно оружје и автоматизирани одлуки со висок ризик. Сам Алтман инсистира дека соработката со владите помага да се обликува одговорната употреба на вештачката интелигенција.

Критичарите, сепак, остануваат внимателни, укажувајќи дека законодавства како Законот за патриотизам би можеле со текот на времето да овозможат проширување на програмите за надзор.

Расправањето се прошири и внатре во самата технолошка индустрија. Повеќе од 200 вработени во „Google“ и „OpenAI“ потпишаа отворено писмо во кое повикуваат на построги ограничувања за воената употреба на вештачката интелигенција, покажувајќи колку длабоко е поделена заедницата на експерти во оваа област.

Овој момент може да претставува пресврт во начинот на кој ги перцепираме компаниите што се занимаваат со вештачка интелигенција, бидејќи етичките прашања се префрлаат од апстрактни дискусии кон конкретни партнерства со влади и прашања на националната безбедност. Без оглед дали движењето „Cancel ChatGPT“ ќе опстои или ќе згасне, јасно е дека разговорот за вештачката интелигенција се движи во насока на поставување јасни граници, пишува „Digital Trends“.