Чунг Џу-јунг (25 ноември 1915 – 21 март 2001) беше јужнокорејски претприемач и основач на групацијата „Hyundai“, еден од најголемите семејни конгломерати во Јужна Кореја.

Роден во сиромашно селско семејство во Тонгчон, тогаш под јапонска власт (денес дел од Северна Кореја), Чунг како најстар од шест деца пораснал во тешки услови, пренесува „Index“.

Неговиот животен пат — од сиромашно детство до статус на еден од највлијателните луѓе во земјата — претставува суштински дел од приказната за јужнокорејското „чудо на реката Хан“.

Рани години

Чунг живеел во селото Асан-ри, во провинцијата Канговон, каде неговото семејство живеело од земјоделство. Како момче сонува да стане учител, но сиромаштијата не му дозволила да продолжи со школување.

Сепак, посетувал локално конфучијанско училиште кое го водел неговиот дедо, каде што стекнал основно образование.

Уште во младоста покажал талент за бизнис — продавал дрва на локалниот пазар. На 16 години, заедно со пријател, побегнал во Чонгџин во потрага по работа и подобар живот.

По неколку неуспешни обиди за бегство, во 1933 година, на 18-годишна возраст, конечно стигнал до Сеул. Работел најразлични работи — од пристаништен работник во Инчон до доставувач во продавницата за ориз „Bokheung“.

Во оваа продавница брзо напредувал и по шест месеци му било доверено водењето на сметководството, што го обликувало неговиот деловен инстинкт.

Основањето на „Hyundai“

Во 1947 година Чунг ја основал компанијата „Hyundai“ (во превод „модерност“), која започнала како градежно претпријатие.

По Корејската војна (1950 – 1953), која ја разурнала инфраструктурата на земјата, Чунг ја искористил шансата за обнова. Добивајќи договори од американската војска за изградба на воени објекти, „Hyundai“ почнал да расте.

Клучен момент бил 1970 година кога, во соработка со претседателот Парк Чунг-хи, го изградил автопатот Гјеонгбу, кој ги поврзува Сеул и Пусан. Овој проект се смета за темел на модерната јужнокорејска инфраструктура.

Чунг потоа го проширил бизнисот на бродоградба — убедил грчки бродовладетели да нарачаат бродови од „Hyundai“, а потоа добил финансирање од лондонски банки за изградба на бродоградилиштето. „Hyundai Heavy Industries“ подоцна станал најголемиот бродоградител во светот.

Покрај тоа, ја развил и „Hyundai Motor Group“, која станала најголем производител на автомобили во Кореја и трет во светот.

Семејство и наследство

Чунг имал пет браќа и една сестра, а со сопругата Бјон Џунг-сок имал осум синови и една ќерка. Имал и две вонбрачни ќерки, признати дури по неговата смрт.

Неговите синови и браќа одиграле важни улоги во управувањето со групацијата „Hyundai“ и во основањето на сопствени компании, како „Halla Group“ и „Hyundai Kia Automotive Group“.

Политички ангажман и однос со Северна Кореја

Во 1992 година Чунг се кандидирал за претседател на Јужна Кореја и освоил 16% од гласовите, но подоцна бил условно осуден за злоупотреба на средства на „Hyundai“ за време на кампањата.

Се залагал за подобрување на односите со Северна Кореја, а во 1998 година симболично пренел 500 грла добиток преку демилитаризираната зона како подарок за севернокорејскиот народ.

Смрт и влијание

Чунг Џу-јунг починал на 21 март 2001 година во Сеул од последици на воспаление на белите дробови, на 86-годишна возраст.

Оставил неизбришлив траг врз јужнокорејската економија, претворајќи го „Hyundai“ во глобална сила и давајќи огромен придонес за „чудото на реката Хан“.

Неговата визија и упорност и денес се слават како пример на претприемачки дух.