Роботакси-услугата на „Tesla“ е инволвирана во повеќе судири откако беше пуштена во ограничен обем ова лето во Тексас, што повторно ја отвори дилемата: дали самовозечките такси-возила навистина се подготвени за реални услови на патиштата? Иако компанијата тврди дека безбедносните оператори седат во секое автономно возило и се должни веднаш да ја преземат контролата доколку системот се соочи со проблем, статистиката покажува дека судирите се почести отколку кај човечки возачи и кај конкурентските роботакси-системи. Новите информации дополнително ја поткопуваат довербата во услугата.

Спиење на должност

Дополнителна сомнеж во сигурноста на услугата "Robotaxi" отвори прашањето за компетентноста на безбедносните надзорници на „Tesla“. Нивната задача е едноставна, но критична: да седат зад воланот и да бидат будни, подготвени за моментално преземање на контролата. Но изгледа дека некои од нив не ја сфаќаат сериозно оваа обврска.

Најдобар пример за тоа е објавата на "Reddit", каде еден корисник тврди дека надзорникот во неговото роботакси во Сан Франциско заспал — трипати за време на истата возачка рута. Патникот успеал да сними една од епизодите на дремка, а видеото прикажува како операторот е потпрен и буквално задремува зад волан, додека возилото продолжува да се движи. Секојпат кога би заспал, во автомобилот би се активирал безбедносниот аларм, кој со силно пискање го будел.

Корисникот на саб-редитот r/sanfrancisco напишал дека веднаш го пријавил инцидентот преку апликацијата на „Tesla“, нагласувајќи дека поседува видео-докази. Меѓутоа, компанијата никогаш не се јавила со одговор. По повеќе од една недела чекање, одлучил објавата да ја направи јавно достапна бидејќи, како што вели, проблемот е сериозен и јавноста мора да знае.

Приказната добила уште поголема тежина кога се јавил втор корисник на "Reddit", тврдејќи дека имал ист безбедносен оператор — кој исто така спиел речиси цело време за време на неговата возачка рута.

Од „Tesla“ сè уште нема официјална реакција.