Норт ги изненади своите следбеници споделувајќи фотографии од нејзината рака украсена со повеќе парчиња накит, вклучувајќи два дермални пирсинзи вградени во прстите.

Фотографиите што ги објави „The Sun“ покажуваат пар сребрени скапоцени камења на едниот прст, додека на другиот, на средниот прст, има син камен. Норт првпат го покажа нејзиниот прв сребрен пирсинг во август додека беше во Рим со нејзината мајка.

За разлика од традиционалниот, дермалниот пирсинг вклучува мало, рамно сидро кое хируршки се вметнува под кожата за да го држи накитот на место. Една од фотографиите го покажува самиот процес на вметнување, со игла што била протната низ прстот на Норт.

Лавина критики на социјалните мрежи

Фотографиите брзо се проширија низ социјалните мрежи, а на „Reddit“ се разви расправа околу тоа дали родителите требало да ѝ дозволат на 12-годишничка да направи таква процедура.

„Ова е резултат на обидот на еден родител да биде најдобар пријател наместо одговорна возрасна личност“, напишал еден корисник. Друг додал: „Не можам да замислам да му дозволам на моето 12-годишно дете да има дермални и површински пирсинг како овој, особено со компликациите што доаѓаат со нив“.

Многумина, исто така, ги истакнале потенцијалните медицински ризици. „Потенцијалот за сериозни повреди со овој пирсинг е непотребно висок. Инфекција, отфрлање, оштетување на нервите. Таа не е доволно зрела за одговорно да се грижи за овој пирсинг“, коментирал еден корисник. Голем број корисници, исто така, го критикувале родителскиот стил на Ким Кардашијан, сугерирајќи дека таа „целосно ѝ удоволува на Норт“.

„Дермален пирсинг на раката на 12-годишна возраст е лудост. Ги поддржувам децата кои се изразуваат себеси, но не ова, не на 12-годишна возраст“, коментирал еден родител.

Предупредувања од експерти

Експертите предупредуваат дека постапката носи значителни ризици, особено кога се изведува на раце кои се склони кон бактерии, удари и движења кои лесно можат да предизвикаат отфрлање или инфекција на пирсингот. Според „Healthline“, дермалниот пирсинг „носи висок ризик од компликации и овој вид пирсинг бара прецизна постоперативна нега“.

Од друга страна многу студија одбиваат да вршат дермален пирсинг на лица под 18 години од безбедносни и хигиенски причини.

Тристн Петерсон, ко-сопственичка и професионален пирсер во „Brightside Body Art“, изјавила за „Scary Mommy“ дека дермалниот пирсинг речиси никогаш не го одобруваат за малолетници. „Повеќето студија за пирсинг нема да направат површински пирсинг кај лица под 18 години“, рекла таа.

„Површинските пирсинзи не се трајни и вашето тело со текот на времето ќе ги отфрли, што резултира со видливи лузни“. Нејзиното студио прави пирсинг само кај клиенти на возраст меѓу 13 и 18 години во ограничени области, како што се ушните реси или на нос, но никогаш на прстите. „Што се однесува до површинските пирсинзи на прстите, повеќето пирсери тоа не би им го понудиле ниту на возрасни“, објаснила Петерсон.

Ким за родителството и стилот на Норт

Ријалити ѕвездата и порано се соочувала со критики за модните избори на нејзината ќерка, како на пример кога Норт носела корсет за време на ноќно излегување во Рим. Иако во тоа време не се огласи, Кардашијан подоцна објасни дека „сè уште учи“ како мајка и дека Норт експериментира со нејзиниот стил.

„Навистина е тешко и интересно затоа што сите деца носат исти работи“, рекла Кардашијан во поткастот „Call Me Daddy“. „Но, потоа мојата ќерка се обидува да го носи тоа, а јас велам: „Океј, никогаш повеќе нема да го носиме тоа“. За жал, ја направивме таа грешка пред целиот свет“, додала Кардашијан. Таа објаснила дека Норт претежно се облекува како момче и само сакала да проба нешто што го носеле нејзините пријателки.

„Како мајка, учиш во исто време. Но, она што го знам е дека моето бебе е толку добро девојче и толку слатко девојче. Работите што ги искусила, каде што можеби била отворена или направила нешто, таа учи од тоа. Ме слуша, но во други области јас сум како: „Душо, ако сакаш сина коса, направи го тоа“. Тоа ја прави многу среќна. Никогаш не би ѝ ја одзела таа креативност“, објаснила Ким.

Исто така Кардашијан побарала разбирање од јавноста: „Мислам дека секој што одгледува деца, особено јас што сама одгледувам четири деца, прави најдобро што може и моите бебиња се добри бебиња. Затоа, само ги повикувам сите да не осудуваат и да бидат милосрдни кон самохраните мајки кои се обидуваат да сфатат сè со дете во пред тинејџерски години. Тоа е многу“.