Пејачот на британската група „Radiohead“, Том Јорк, изјави дека моментално нема намера да настапува во Израел, осум години откако бендот им пркосеше на пропалестинските активисти и одржа концерт во Тел Авив.
Во интервју за „Sunday Times“, 57-годишниот музичар изјави дека нема да настапува во Израел сè додека Бенјамин Нетанјаху е на власт.
„Апсолутно не. Не би сакал да бидам ни 8.000 километри блиску до режимот на Нетанјаху“, изјави тој, мислејќи на владата на премиерот.
Интервјуто со членовите на британскиот бенд било направено пред договорот за прекин на огнот меѓу Израел и Хамас.
Бендот следниот месец ја започнува својата прва турнеја по седум години, со 20 концерти во пет европски градови. Пред датумите официјално да бидат потврдени, организаторите на Палестинската кампања за академски и културен бојкот на Израел веќе објавиле соопштение со кое повикуваат на бојкот на турнејата, како реакција на настапот на членот на бендот Џони Гринвуд во Тел Авив во 2024 година.
Светската турнеја на „Radiohead“ под наслов „A Moon Shaped Pool“ (2016–2018) предизвика бурни реакции откако групата настапи во Тел Авив, и покрај повиците на бојкот и јавните критики од културни личности, меѓу кои и британскиот режисер Кен Лоуч.
Во објава на „X“ во тој период, одговарајќи директно на Лоуч, Јорк изјави дека настапувањето во некоја земја не значи и поддршка на нејзината влада.
„Свиревме во Израел повеќе од 20 години, под различни влади – некои полиберални, некои помалку. Како што свириме и во САД. Не го поддржуваме Нетанјаху ништо повеќе од Трамп, но сепак свириме во САД“, изјави тогаш Јорк.
Јорк претходно го критикуваше пропалестинското движење за бојкот, дезинвестирање и санкции (BDS), нарекувајќи го „екстремно покровителско“ и „навредливо“.
Во новото интервју, Јорк навести одредено жалење поради одлуката да настапи во Тел Авив во 2017 година, изјавувајќи дека бил „згрозен“ кога „очигледно поврзан високопозициониран“ Израелец дошол во нивниот хотел да им се заблагодари за концертот.
Ставот на бендот кон Израел со години ги прогонува неговите членови. Минатата година, за време на настап во Австралија, Јорк накратко ја напушти сцената откако пропалестински провокатор извика: „Колку мртви деца се потребни за да го осудиш геноцидот во Газа?“.
Подоцна, тој објави изјава во која напиша дека инцидентот во Мелбурн го оставил во шок и дека е ужаснат што неговото наводно молчење се толкува како соучесништво. Во истата изјава, го нарече Нетанјаху и неговата администрација „екстремисти кои мора да бидат запрени“.
Колегата на Јорк од бендот, Џони Гринвуд, е оженет со израелска уметница и постојано се соочува со критики од поддржувачите на бојкотот поради неговата долготрајна соработка со израелскиот рок музичар Дуду Таса. Во 2024 година, Гринвуд им се придружи на протестите во Израел кои повикуваа на оставка на Нетанјаху.
Гитаристот на „Radiohead“ изјави за списанието „Sunday Times“ дека поминал многу време во Израел со своето семејство и дека не се срами од соработката со арапски и еврејски музичари.
