Од 3 до 9 ноември, „Gastronomy Week 2025“ ги поканува светските љубители на гастрономијата да го искусат уникатниот пристап на градот кон модерната северноевропска кујна – таму каде што шумата се среќава со елитната гастрономија, а древните традиции добиваат нов израз преку инвентивни менија засновани на природни состојки.

Гастрономија без граници

„Вилнус го заслужи ‘Michelin’ признанието втора година по ред“, изјави Егле Лижајтите, извршна директорка на Асоцијацијата на хотели и ресторани на Литванија. „Овој растечки меѓународен интерес ја одразува самодовербата на нашите готвачи да бидат сè покреативни. Највозбудливо е што соработката меѓу готвачите и локалните производители сè повеќе помага да се дефинира автентичниот литвански израз на современата кујна“.

„Темата на оваа година – ‘Gastronomy Without Borders’ – е особено значајна. Нашите готвачи прифаќаат глобални влијанија, мешајќи локални традиции со неочекувани зачини, енергијата на уличната храна и прецизноста на елитната гастрономија. Резултатот е храна што е длабоко вкоренета во Литванија, но отворена и поврзана со светот“.

Темата „Gastronomy Without Borders“ одразува како готвачите во Вилнус ги спојуваат светските техники со длабоко локални состојки – од шумски печурки, ‘рж и бобинки, до ферментирани зеленчуци – создавајќи јадења вкоренети во локалната традиција, но збогатени со нови, егзотични вкусови и зачини.

„Вилнус е мал по големина, но храбар по вкус,“ вели Вилма Даубариене, раководителка на туризмот во „Go Vilnius“. „Нашите готвачи оживуваат заборавени рецепти, ја користат шумата како своја остава и ја прифаќаат одржливоста. Горди сме што сè повеќе гастрономски туристи од цела Европа и пошироко доаѓаат кај нас – и што можеме да им понудиме нешто што нема да го најдат никаде на друго место“.

„Michelin“ признание

„Michelin“ не само што додели ѕвезди на рестораните „Nineteen18“, „Džiaugsmas“, „Demo“ и „Pas mus“ во Вилнус, туку ја додели и Зелената ѕвезда за одржливост на „Demo“ – ресторан кој локалните производи ги трансформира на неочекувани начини.

Пет јадења што ја дефинираат локалната храна – преосмислени

Ова се пет јадења што ја претставуваат внимателната гастрономска филозофија на градот:

Чебурек, печурки и бујон – „Nineteen18“

Во ресторанот со „Michelin“ ѕвезда „Nineteen18“, готвачот Андриус Кубилиус ги издигнува регионалните вкусови во искуство на префинета кујна. За време на „Gastronomy Week“, тој го реинтерпретира класичниот трио состав од чебурек, печурки и бујон во софистицирана композиција каде што традицијата се спојува со гастрономската уметност.

Севиче од халибут со морски трн – „Stikliai“

Ова јадење во „Stikliai“ ги спојува вкусовите на морето и шумата. Лесното севиче од халибут се надополнува со желе од морски трн, светол гел од морски трн и портокал, и нежна нота од чаден кавијар – создавајќи свежа и уникатна комбинација на вкусови.

Пивска супа – „Ertlio Namas“

Готвачот Томас Римидис, основач и креативна сила зад „Ertlio Namas“, е специјализиран за современи интерпретации на благородни историски литвански јадења. За „Gastronomy Week 2025“, тој ја обновува традиционалната рустикална супа како топла, бујна пивска супа збогатена со просо – создавајќи оревест и смирувачки вкус.

Шарлот од круша со сладолед од борова шишарка – „14Horses“

Овој носталгичен десерт од „14Horses“ ја претставува литванската шума на чинија. Префинетата шарлот торта од круша е покриена со сладолед направен од вистински борови шишарки. Вкусот носи ноти на четинар и карамела, создавајќи незаборавно и избалансирано искуство.

Традиционална литванска вафла со месо од елен – „Pacai“

Готвачката Года Јукнаите-Ламсарге повторно го замислува литванскиот класик со префинета едноставност. Крцкавата вафла служи како подлога за нежно месо од елен, живописен чимичури од нане и кисела дуња – спојувајќи сладост, киселост и длабочина во секој залак.

Компактна престолнина со светски вкус

Вилнус, град со нешто над 600.000 жители, докажува дека гастрономската извонредност не е резервирана само за големите метрополи. Во споредба со градови како Берлин или Копенхаген, каде конкуренцијата е жестока и сцената преполна, Вилнус нуди нешто освежувачко – растечки гастрономски идентитет обликуван од традицијата и креативноста.

Надвор од „Michelin“ признанијата, готвачите во Вилнус ги преосмислуваат омилените брзи јадења како пица, ги истражуваат кулинарските традиции на различни локални култури и нудат „тури“ низ Рим, Токио и Париз – сите интерпретирани низ балтичка призма. Гастрономските доживувања се протегаат и надвор од чинијата: дегустации на врвот на ТВ-кулата во Вилнус, експериментални спојувања во историски дворови и дегустациски менија инспирирани од раскажување приказни.

Пристапна дестинација за гастрономски истражувачи

Добро поврзан со поголемите европски градови и лесно достапен за патници од Америка или Азија преку центри како Франкфурт, Копенхаген и Хелсинки, Вилнус е природна станица за оние што го истражуваат Балтикот или сакаат да навлезат подлабоко во помалку познатите европски гастрономски сцени.

Без разлика дали ги „бркате“ „Michelin“ ѕвездите, локалните пазари или незаборавните јадења на неочекувани места – Вилнус нуди нов вид кулинарно патување.

Фото: Malgorzata Opal