Доколку детето постојано ги следи правилата само за да им угоди на родителите, поголема е веројатноста дека како возрасна личност ќе биде исцрпено и несигурно во себе.

На тоа предупредува детскиот психолог Беки Кенеди.

„Ги сакаме децата кои им угодуваат на другите затоа што брзо препознаваат кога сме задоволни и се приспособуваат. Но, токму тие особини подоцна можат да доведат до тешкотии и чувство на празнина во поодмината доба“, објаснила Кенеди, авторка на популарниот поткаст за родители „Good Inside“.

„Децата, особено девојчињата, често од мали нозе учат да се занемаруваат себеси за да им угодат на другите. Не е ниту чудно што многу од нив подоцна не влегуваат во здрави односи и се чувствуваат изгубено“, додала таа.

Кога туѓите потреби секогаш се ставаат на прво место

Угодувањето на другите во поодмината доба често води кон потиснување на емоциите, избегнување конфликти и потреба за надворешно одобрување.

Тоа може да влијае на самодовербата, развојот на блиските односи и професионалниот напредок.

Како да му помогнете на дете кое постојано им угодува на другите?

Кенеди ги советува родителите да практикуваат три едноставни стратегии.

1. Покажете љубов и кога сте лути

Важно е детето да знае дека е сакано без оглед на однесувањето. Кажете нешто како „да, лута сум, но те сакам“. Со тоа му давате сигурност на детето дека вашата љубов не зависи од неговата послушност.

2. Поттикнете самостојност

Кога детето ќе направи нешто поразлично од вас, пофалете го. На пример: „Јас вообичаено пијам само јогурт, а ти знаеш дека не го сакаш и бираш печиво. Ми се допаѓа тоа што знаеш што сакаш“.

3. Учете ги да носат сопствени одлуки

Ставете баланс во учењето на споделување и јакнење на самодовербата. Доколку братот ја сака играчката со која детето моментално игра, може да кажете: „Може уште малце да си поиграш пред да му ја дадеш. Не е твоја задача веднаш да ја предадеш играчката“.

Децата учат гледајќи ги родителите

Кенеди истакнува дека децата најмногу учат од однесувањето на родителите. Доколку и самите често ги ставате туѓите потреби пред своите, голема е веројатноста и вашето дете да развие слични обрасци на однесување.

Важно е да знаете дека желбата да им помагате на другите не е лоша, но не треба да ги надвладее сопствените потреби. Експертите советуваат пред да се согласите на дополнителни обврски, прво да ги процените своите можности и ниво на енергија.

„Важно е на работа да стигнеме одморени, стабилни и без прикриени горчини. Тоа ни користи и нас и на сите околу нас“, заклучила советничката за граници Хајли Маги.