Маск во средата наутро преку мрежата „X“ упати порака до своите следбеници: „Откажете го ’Netflix‘ заради здравјето на вашите деца.“ Ова следуваше откако тој ја критикуваше анимираната серија во која главен лик е трансроден тинејџер. Маск претходниот ден веќе најави дека ја откажал својата претплата на оваа популарна стриминг-платформа.

Неговиот истап е дел од поширока тенденција – милијардерот и сопственик на „X“ сè почесто се вклучува во културни и општествени дебати, користејќи ја својата огромна публика од над 226 милиони следбеници за да изврши притисок врз компании и медиуми со кои не се согласува.

Контроверзната серија што ја отвори расправата

Серијата што ја започна оваа дебата е анимираната фантастична хорор-комедија „Dead End: Paranormal Park“, премиерно прикажана во 2022 година и траеше две сезони. Главниот јунак е трансроден тинејџер, што предизвика критики од конзервативни групи и јавни личности на социјалните мрежи.

Маск даде поддршка на профили како „@LibsofTikTok“ кои повикаа на бојкот на „Netflix“ поради, како што наведуваат, „промовирање на транс-идеологија кај децата“. Некои корисници споделија и наводни снимки од изјави на авторот на серијата, Хамиш Стил, во кои тој негативно коментирал за конзервативецот Чарли Кирк, но овие тврдења не се потврдени бидејќи профилот на Стил е заклучен.

„Netflix“ под притисок

Иако не е познато колкав е вистинскиот ефект од објавите на Маск, бројни корисници на „X“ наведоа дека веќе ја откажале или планираат да ја откажат својата претплата на „Netflix“. Некои дури поставија слики од страницата за откажување како доказ за својот чекор.

„Netflix“ засега не одговори на барањата на медиумите по повод изјавата на Маск. Сепак, акциите на компанијата паднаа за околу 2% во средата во услови на поширока нестабилност на пазарот, што дополнително ја зголеми вниманието околу случајот.

Маск и семејните и јавните разидувања

Илон Маск има трансродна ќерка – Вивијан Џена Вилсон – која јавно се откажа од неговото презиме и се дистанцираше од својот татко. Таа во интервјуа ги критикуваше неговите ставови за транс-заедницата, додека Маск повеќепати јавно коментираше за нејзината транзиција.

Во разговор со психологот Џордан Питерсон во 2024 година, Маск изјави дека „woke вирусот“ го „убил неговото дете“, што предизвика жестоки реакции и уште повеќе ја продлабочи неговата улога во културните судири на интернет.

Уметничка слобода или бојкот?

Ова не е првпат „Netflix“ да се соочи со повици на бојкот. Во 2021 година компанијата беше остро критикувана поради настапите на комичарот Дејв Чапел, кој во своите специјали се шегуваше на сметка на трансродните лица, што многумина го оценија како трансфобично.

Тогашниот копретседател на „Netflix“, Тед Сарандос, изјави дека компанијата „не може на сите да им угоди“, но дека цврсто стои зад уметничката слобода и креаторите со кои соработува. Тие зборови се актуелни и денес, додека „Netflix“ повторно се наоѓа во центарот на културно преиспитување.