„Сакам да размислувам проактивно – што можам да направам за да спречам мозочен удар?“, вели неврологот д-р Ентони Ким за "HuffPost". Тој и неговите колеги откриваат кои навики ги избегнуваат за да го зачуваат здравјето на крвните садови и да го намалат ризикот од мозочен удар:

1. Недостаток на движење и премногу седење

Долготрајното седење и физичката неактивност значително го зголемуваат ризикот. Неврохирургот д-р Артур Ванг нагласува:

„Редовната физичка активност ја одржува проодноста на крвните садови и го спречува наталожувањето на масни наслаги.“

Препорачува најмалку 30 минути умерена активност, 5 пати неделно.

2. Игнорирање на високиот крвен притисок

Д-р Ким вели дека високиот крвен притисок е најголемиот поединечен ризик за мозочен удар.

„Ако магично го елиминиравме, ќе имавме 60% помалку мозочни удари.“

Редовно мерење и терапија се клучни, бидејќи симптомите често не се чувствуваат.

3. Прескокнување редовни лекарски контроли

„Факторите како висок притисок или холестерол не даваат симптоми", вели д-р Ванг.

Редовни контроли помагаат да се следат крвниот притисок, холестеролот, шеќерот и телесната тежина – но и да се процени генетскиот ризик, полот и расата.

4. Пушење

Пушењето драматично го зголемува ризикот.

„Предизвикува стеснување на крвните садови, што може да доведе до затнување и прекин на дотокот на крв до мозокот“, објаснува д-р Ким.

5. Претерано консумирање алкохол

Прекумерното пиење е поврзано со срцеви заболувања и мозочни удари.

Според "CDC", повеќе од 4 пијалаци одеднаш кај жени или 5 кај мажи се смета за прекумерно.

6. Лоша и неурамнотежена исхрана

Исхрана богата со заситени масти, шеќери и сол го зголемува ризикот, особено преку влијание на притисокот.

Препорака: повеќе зеленчук, овошје, интегрални житарки, маслиново масло, риба и јаткасти плодови.

7. Непрепознавање на симптомите навреме

Клучно е симптомите на мозочен удар да се препознаат веднаш, бидејќи третманот е најефикасен во првите часови.

Многу мозочни удари не се болни, а симптомите можат да бидат различни – затоа се користи акронимот Г.Р.О.М. (по англ. F.A.S.T.):

- Говор – потешкотии во говорот, нејасно изговарање зборови или изговор на бесмислици.

- Рака – слабост, трнење или неможност за подигање на една рака.

- Опуштеност на лицето – една страна од лицето паѓа или е неподвижна.

- Минутите се важни – веднаш јавете се на итна помош!

„Ако се појави кој било од овие знаци – веројатноста за мозочен удар е голема", заклучува д-р Ким.