Европскиот центар за превенција и контрола на болести (ECDC) издаде предупредување за бактериите од родот Vibrio. Иако до неодамна беа карактеристични за Балтичкото Море, поради глобалното затоплување и зголемувањето на температурата на морето, тие сега се појавуваат сè повеќе во Северното Море, па дури и во затворените капалишта низ Европа.

Овие бактерии природно живеат во солени крајбрежни води, каде што се мешаат свежата и солената вода, а идеалните услови за нивно размножување се високите температури и пониската соленост.

„Ваквите услови стануваат сè почести во делови од Европа како резултат на климатските промени“, истакнува ECDC.

Опасност од морето и во чинијата

Болеста позната како вибриоза може да предизвика сериозни здравствени компликации. Најчесто се пренесува на два начина: со консумирање сирова или недоволно зготвена морска храна, особено остриги, или со пливање во контаминирана вода со отворена рана на телото, како што е исеченица.

Лицата со ослабен имунолошки систем и оние со хронично заболување на црниот дроб се особено изложени на ризик. Кај нив, инфекцијата може да доведе до сериозни последици како што се сепса, инфекција на крвотокот, некротизирачки фасциитис (тешка инфекција на меките ткива), а во најтешките случаи, исходот може да биде ампутација на екстремитет.

Зголемениот број на инфекции загрижува

Иако ECDC наведува дека ваквите инфекции се сè уште „релативно ретки“ во Европа, податоците од северните земји покрај Балтичкото Море покажуваат загрижувачки тренд на раст, особено во текот на летото со изразени топлотни бранови.

На пример, во текот на летото 2018 година со рекордни температури, регистрирани се дури 445 случаи на вибриоза. Ова е повеќе од трипати повеќе од годишниот просек од 126 случаи регистрирани помеѓу 2014 и 2017 година. Експертите од агенцијата предупредуваат дека реалниот број е веројатно поголем бидејќи многу случаи не се пријавуваат.

Како да се заштитите?

За да се минимизира ризикот од инфекција, ECDC советува да се избегнува консумирање на сирови школки и темелно да се готват сите морски плодови. Лицата со отворени рани, исеченици или свежи пирсови треба да избегнуваат пливање во соленкаста или солена вода, а доколку тоа не е можно, раната треба да се заштити со водоотпорен завој.

Агенцијата ги повикува граѓаните да бидат свесни за ризиците и да се обратат на лекар доколку забележат какви било симптоми по пливање или консумирање морска храна.