Според „Дејли Стар“, овој галеб секој ден учтиво чека пред локален ресторан за својот омилен оброк, докажувајќи дека и меѓу овие птици има „кавалери“.

Лојален гостин со префинет вкус

За разлика од своите агресивни роднини познати по тоа што се нафрлаат врз луѓето за да им ја украдат храната, овој галеб е сосема спротивен. Локалните жители и персоналот од помал ресторан „Palm Bay Fish Bar“ потврдија дека птицата се појавува на почетокот и на крајот од секој работен ден. Сепак, таа никогаш не влегува внатре ниту прави неред. Трпеливо стои на влезот и чека.

Неговиот омилен оброк е похуван колбас со компири, но интересно е што тој не е љубител на колбасите од типот „saveloy“. Поради неговата редовност, сопствениците го нарекуваат свој најлојален муштерија.

Бидејќи стана вистинска маскота, персоналот на ресторанот одлучи да му даде име и побара предлози преку социјалните мрежи.

„Нашиот најлојален муштерија. Тој е тука секој ден од отворањето до затворањето“, објавија тие. „Бараме име, сите предлози се добредојдени“.

Овој потег наиде на одобрување од локалното население, кои потврдија дека добро го познаваат пердувестиот гурман. „Тие имаат најдобра риба со компири, па галебот очигледно има добар вкус“, коментираше една честа гостинка на ресторанот. „Го обожувам, доаѓа секоја вечер“, додаде друг. „Се надевам дека има кеш. Не примаат картички“, се пошегува еден корисник на социјалните мрежи.

Овој симпатичен случај е спротивен на општиот тренд на однесувањето на галебите. Научниците тврдат дека популацијата на галебите во британските градови се дуплирала бидејќи им е полесно да „крадат“ печива од луѓе отколку да бараат остатоци во дивината.

Тие наведуваат податоци што покажуваат дека бројот на урбани колонии на галеби во Велика Британија од 2000 година скокнал од 239 на дури 585. Понатаму, извештаите покажуваат дека галебите често ловат во групи за да крадат храна од луѓе. Експертите објаснуваат дека тие се премногу претпазливи за да напаѓаат сами, но кога се во група, се чувствуваат многу посигурно да ги извршат своите напади.

Сепак, додека науката потврдува дека галебите се сè поголема урбана закана, еден учтив гостин од Маргејт е доказ дека дури и меѓу нив има исклучоци кои, наместо страв, предизвикуваат симпатија и стануваат локални легенди.