Целата куќа, вклучувајќи ги и внатрешните ѕидови, била изградена со помош на „Scoolpt“ роботската рака која врши 3Д печатење, а за печатењето биле употребени околу 17 тони бетонска мешавина. Во текот на изградбата биле извршени различни тестови во кои учествувале факултетите од Прага. Некои од овие тестови вклучувале испитување на статички притисок, со цел да се утврди колкаво оптоварување може да издржи внатрешниот носечки ѕид.

Куќа без врата

Инспирацијата за изгледот на куќата била пронајдена во микроскопските организми протозои. Дизајнерот Михаел Трпак истакнал дека ѕидовите и прозорците се еколошки прифатливи, бидејќи ја намалуваат емисијата на CO2. Печатењето исто така користело еколошки техники, што ја прави куќата делумно самоодржлива.

Има 43 квадратни метри и содржи три простории – бања, дневна и спална соба.

Трпак нагласил и дека во внатрешноста нема врати, а тоа е она што ја прави куќата посебна.

„Куќата може да се расклопи на три единици за транспорт, а потоа повторно да се состави на друга локација. Овој метод на градба го поедноставува процесот бидејќи куќата ја градиме во стара фабричка хала“, рекол Трпак.

Рушење и повторно печатење

Трпак пред неколку години, кога дизајнирал забна лабораторија, почнал да размислува за изградба на куќа со помош на 3Д печатење. Меѓутоа, како што истакнал, не се појавила можност за спроведување на оваа идеја. Кога конечно се појавила, самата куќа била изградена за помалку од 32 часа, а целиот проект бил завршен за околу два месеци.

„Во иднина, сопствениците можат да ја сомелат зградата кога ќе заврши нејзиниот животен век и повторно да ја испечатат на истата локација користејќи ист материјал“, нагласил Михаел.