Норвешкиот атлетичар Јакоб Ингебригтсен, кој е двократен олимписки шампион и светски рекордер на 1.500 метри, вчера сведочеше во судот во Санднес, каде што го тужеше својот татко и поранешен тренер Гјерт Ингебригтсен, обвинувајќи го за години на физичко и психолошко насилство.

Ингебригтсен детално опиша како татко му го малтретирал, истакнувајќи дека неговото детство било обележано со страв и манипулација.

„Пораснав во страв. Сè беше однапред одлучено за мене, се чувствував како да немам право на избор“, изјави 24-годишниот атлетичар пред судот, пренесе "Index.hr".

Обвинувања за физичко и психолошко насилство

Гјерт Ингебригтсен, кој ги тренираше Јакоб и неговите браќа Филип и Хенрик до 2022 година, е обвинет за долгогодишно злоставување, кое вклучува и физички напади врз Јакоб и неговата помлада сестра Ингрид.

Злоставувањето траело 14 години

Според обвинението, насилството се случувало меѓу 2008 и 2022 година и вклучувало удирање со тупаници, шлаканици и вербални закани.

Во своето сведочење, Ингебригтсен изнесе конкретни примери на насилство, вклучително и еден случај од детството, кога татко му го удрил откако добил негативни информации од училиштето.

„Не знам точно колку пати ме удри, но додека седев таму, ми се чинеше како да трае цела вечност. Мислам дека ме удри меѓу 10 и 20 пати, а јас само се обидував да се заштитам“, изјави Ингебригтсен, пренесе "Sportal".

Запрашан зошто престанал да го нарекува својот татко „тато“ кога имал околу 11 години, Јакоб одговори:

„Повеќе не го доживував како татко. Мислев дека нештата што ги кажува, што ги прави и начинот на кој се однесува, не се достојни за татко.“

Одбраната: „Станува збор за високи спортски стандарди“

Адвокатите на Гјерт Ингебригтсен тврдат дека обвинувањата се неосновани и дека строгите правила во семејството биле резултат на високите стандарди потребни за постигнување врвни спортски резултати.

Една од адвокатките, Хајди Рејсванг, истакна дека документарната серија „Тим Ингебригтсен“, која го следеше семејството низ пет сезони, не покажала никакви докази за злоупотреба.

Таткото се соочува со казна затвор до шест години

Ингебригтсен, кој минатиот викенд се врати од Кина со две златни медали од Светското првенство во сала, нагласи дека му било тешко да зборува за овие искуства, но го прави тоа за вистината да излезе на виделина.

Судењето ќе трае до 16 мај, а доколку Гјерт Ингебригтсен биде прогласен за виновен, се соочува со затворска казна до шест години.

Следен сведок ќе биде сестрата на Јакоб, Ингрид, која ќе ги изнесе своите искуства за таткото како авторитарен и агресивен родител.

Овој случај предизвика огромно внимание во Норвешка и ширум светот, со оглед на тоа дека семејството Ингебригтсен е национална спортска икона – сведочењето на Јакоб во живо го следеле повеќе од 200.000 луѓе.