Планирате патувања во 2027 година? Постојат многу помалку познати дестинации што можете да ги изберете доколку сакате да истражувате места надвор од вообичаените туристички рути. Сепак, постои и долга листа на земји кои со години се меѓу најбараните туристички дестинации, пишува „Тајм аут“.

Токму таквите дестинации ги препознаваат наградите „Readers‘ Choice Awards“ на списанието „Вондерласт“ со кои се избираат најпосакуваните места за патување во светот. Врз основа на гласовите на 251.461 искусен патник, кои вкупно дале 8,2 милиони гласови, списанието ја објави својата годишна листа на најдобри дестинации за посета ширум светот.

Костарика прогласена за најпосакувана земја во светот

За 2026 година, читателите на списанието „Вондерласт“ ѝ ја доделија престижната титула најпосакувана земја во светот на Костарика, која минатата година го зазеде второто место.

„Костарика останува пример за одговорен туризам, заснован на мрежа од мали, ексклузивни сместувачки капацитети и туристички понуди со кои управуваат локалните заедници. Туристичката организација на оваа земја веќе речиси 30 години спроведува сопствена програма за сертификација на одржлив туризам, многу пред ’одржливоста‘ да стане популарен термин“, се наведува во текстот.

„Посетителите лесно можат да ги забележат резултатите од ваквиот пристап, без разлика дали учествуваат во следењето на младенчињата на желките во Тортугеро или во набљудувањето на Баирдовите тапири на полуостровот Оса, за кој се смета дека е дом на околу 2,5 отсто од вкупниот светски биодиверзитет“.

Веднаш зад Костарика се најде минатогодишниот победник, Јапонија, додека Јужноафриканската Република го зазеде третото место.

Во продолжение погледнете ја листата на 10-те најпосакувани земји во светот, меѓу кои особено се издвојуваат дестинациите во Источна Азија и Јужна Америка.

Десетте најпосакувани земји во светот

✈️Костарика

✈️Јапонија

✈️Јужноафриканска Република

✈️Канада

✈️Тајланд

✈️Австралија

✈️Соединети Американски Држави

✈️Перу

✈️Јужна Кореја

✈️Колумбија

Погледнете ја и целосната листа на добитници на наградите „Readers‘ Choice Awards 2026“ на списанието „Вондерласт“ објавена на неговата официјална веб-страница.