Во една дискусија на Редит, разведени мажи споделиле на кои начини се промениле нивните бракови непосредно пред распаѓањето. Корисничка на форумот r/AskMen во септември поставила прашање за тоа што престанале да прават нивните сопруги пред разводот, а објавата собрала повеќе од 460 гласови и 300 коментари, пишува „Daily Dot“.

„Станавме само цимери“

Еден корисник опишал како се обидел да разговара со поранешната сопруга за чувството на отуѓеност.

„Ѝ реков дека се чувствувам како да сме само цимери, што таа не го прифати добро“, напишал тој. Во своите претходни коментари, како што вели, детално опишувал колку лош бил бракот: „Не тврдам дека бев совршен, направив многу грешки“.

Неговата поранешна сопруга, според неговите зборови, имала поинакво гледиште за ситуацијата и сметала дека тој е „одговорен за сè, вклучително и за пропаста на Римското Царство“. Тој ги опишал и промените во нивниот заеднички живот. На пример, бидејќи таа сметала дека си легнува премногу доцна, му рекла да спие на душек на подот.

Интимност и чувство на сигурност

Друг коментатор ја анализирал поврзаноста меѓу сексот и блискоста.

„Недостигот од секс не е причина, туку последица на недостигот од емоционална интимност. Од друга страна, недостигот од секс предизвикува и недостиг на емоционална интимност“, напишал тој. На останатите им порачал да престанат да го користат зборот „сигурност“ и го опишал како популарна фраза без вистинско значење.

Овој корисник смета дека „жените нема да бидат интимни со сопрузите сè додека не се чувствуваат сигурно надвор од спалната соба“. Поставил и неколку прашања за заемноста во врската:

„Ако не ги задоволувате неговите физички, емоционални и ментални потреби, зошто тој би се трудел да ги задоволи вашите? Ако престанете да бидете интимни со него, зошто очекувате тој да биде интимен со вас?“.

Обострана одговорност и нееднакви улоги

Еден од учесниците во дискусијата истакнал дека одговорноста за задоволување на потребите е обострана и ги опишал специфичните ризици со кои се соочуваат жените.

„Во идеална врска, двајцата партнери настојуваат да ги задоволат потребите на другиот. Нема причина потребите на мажот да бидат поважни од потребите на жената“, напишал тој.

Нагласил дека улогите не се еднакви.

„Жената има повеќе да изгуби во врската со маж“, смета тој, наведувајќи ги бременоста, можноста за самостојно одгледување на децата и физичките ризици. Заклучил дека мажот кој ја заслужува својата партнерка „ќе вложи труд за да ги задоволи нејзините потреби, наместо само да бара секс“.

Бракот како партнерство и грижа

Уште еден корисник како пример за долготрајни бракови без физичка нежност ги навел своите постари роднини.

„Моите баби и дедовци од двете страни на семејството спиеја во одделни соби“, напишал тој и додал дека никогаш не ги видел како се допираат.

„Понекогаш бракот повеќе се сведува на нечие присуство и грижа отколку на страст“, заклучил тој.

Објаснил дека заедништвото добива на вредност во староста.

„Вашите партнери ќе бидат тука за да ве потсетат да ги земете лековите или да ви зготват нешто кога сте болни“, напишал тој.

Сепак, истакнал дека љубезноста меѓу партнерите никогаш не смее да исчезне:

„Целосното исчезнување на љубезноста е сосема друга приказна“.