Двејн Џонсон е снимен во Бруклин, на снимањето на филмот „Lizard Music“ на режисерот Бени Сафди, во кој го игра 70-годишниот маж познат како Чикен Мен.
Џонсон доживеа физичка трансформација за новата улога. На фотографиите од снимањето носи шешир и капут, а во раката држи парче пица додека оди покрај својот млад колега Тео Кларк Лебер.
За изгледот на Џонсон е задолжен Казу Хиро, уметникот кој неодамна го претвори Том Круз во остарен нафтен магнат за филмот „Digger“.
„Lizard Music“ е заснован на истоимената книга за деца од Даниел Пинквотер. Приказната го следи момчето кое е оставено само на себе и кое случајно открива таен доцноноќен телевизиски пренос во кој гуштери свират необична музика. Барајќи одговори, го запознава чудниот Чикен Мен и неговата остарена миленичка, кокошката Клаудија, кои исто така виделе нешто невозможно.
Заедно тргнуваат во авантура што започнува како потрага по тајно друштво, а прераснува во патување низ невидливи светови и приказна за пријателството.
Во филмот глумат и Рејчел Мекадамс, Колман Доминго, Дејвид Крамхолц, Џеф Голдблум, Алиша Силверстоун и Реџина Хол. Премиерата е планирана за Божиќ 2027 година.
Џонсон на Филмскиот фестивал во Торонто во 2025 година изјави дека лесно се согласил да го снима „Lizard Music“ и дека на Сафди му биле потребни околу 45 минути за да го убеди. Откри и дека за улогата на Чикен Мен изгубил околу 14 килограми, додавајќи:
„Толку сум возбуден што, се надевам, повторно ќе добијам можност за трансформација каква што ми беше овозможена во „Smashing Machine“. Тоа значи да јадам помалку пилешко“.
