Гатузо: Немаме многу пари, но имаме нешто поважно

Иако многумина се потсмеваа со него кога го презема Лацио, Рино засега ги замолкнува устите на сите критичари и се погрижи за старт кој е убедливо најдобар во историјата, бидејќи билансот од шест победи и едно реми е подобар и од оној од сезоната кога беше освоено Скудетото (2000-та година).

Гатузо го прослави големиот успех со многу емоции во друштво на играчите и навивачите на Лацио, а 19-от бод на седмиот одигран натпревар прави Лацио да биде лидер со Интер на врвот на табелата.

– Ова е првпат да победам овде откако почнав да се занимавам со оваа тренерска професија. Јас и мојот стручен штаб даваме идеи, но момците се тие што ги спроведуваат во дело, па затоа заслугите им припаѓаат ним.

– Напорно работиме на тренинзите, но овде создадовме вистинска семејна атмосфера. И клубот заслужува пофалби за ова што го доживуваме сега. Имавме малку средства за трансфер-пазарот, но баравме добри луѓе, полни со решителност, играчи кои по секоја цена сакаа да дојдат овде. Потребно беше време, немавме многу пари, но за мене е лесно да работам со вакви играчи. За мене поважно е што имам играчи кои имаат желба и натпреварувачки дух.

– И покрај добриот старт, во моментов не смееме да гледаме кон табелата. Ќе уживаме во оваа прекрасна победа, но потоа ќе ги наведнеме главите и ќе се вратиме назад на работа, во пресрет на натпреварот против Парма. Не сме навикнати да бидеме толку високо на табелата, а можеби и не сме подготвени за тоа, но ако одиме чекор по чекор, односно натпревар по натпревар, можеме да приредиме изненадување, – изјави Гатузо.