Според извештајот на организацијата „European Best Destinations“ (Најдобри европски дестинации), која на листата вклучила „10 градови со многу различен карактер“, бугарската престолнина го освоила првото место благодарение на „древната историја, современата култура и планините“, кои заедно создаваат „особено привлечна комбинација“.

Лисабон, кој неодамна беше прогласен за најсреќна туристичка дестинација во светот, го освои второто место на листата на најдобри градови за кратки патувања во 2027 година, додека првите пет ги комплетираат Копенхаген, Кан и Базел. Во првите десет се најдоа и Бристол, Лувен, Милано, Калпе и Верона.

Рангирањето се заснова на гласање што траело 33 дена и во кое учествувале 11.614 претплатници на билтенот на „European Best Destinations“. Секој испитаник можел да гласа за најмногу три дестинации од списокот со 64 европски дестинации избрани од независни туристички новинари. Првите 10 градови биле рангирани според бројот на освоени гласови.

„Одличниот градски одмор ви нуди многу содржини, но и доволно време да уживате во нив. Овде има место за романтично патување, викенд со пријателите, неколку дена покрај морето или посебна пригода што заслужува да се прослави со стил“, наведува „European Best Destinations“.

Најдобрите европски градови за кратки патувања во 2027 година 

1. Софија, Бугарија

2. Лисабон, Португалија

3. Копенхаген, Данска

4. Кан, Франција

5. Базел, Швајцарија

6. Бристол, Обединето Кралство

7. Лувен, Белгија

8. Милано, Италија

9. Калпе, Шпанија

10. Верона, Италија.

„Разновидни доживувања на мал простор“

„European Best Destinations“ ја пофали Софија затоа што на посетителите им нуди „разновидни доживувања на релативно мал простор“. Покрај „културните откритија, добрата храна и вечерните излегувања“, посетителите за време на истото патување можат да уживаат и во шумските патеки и погледите кон планините.

Како што навела Дајана Апен-Садлер во својот водич за Софија за „Јуроњуз“, главниот град на Бугарија, некогаш познат како Сердика, бил еден од најважните градови на Византиската Империја. Тоа е град во кој старото и новото се среќаваат „буквално“.

Меѓу најзначајните знаменитости се издвојуваат Ротондата „Свети Ѓорѓи“, катедралата „Свети Александар Невски“, Плоштадот на толеранцијата и Бојанската црква, единственото место во Софија што се наоѓа на листата на светско наследство на УНЕСКО. 

„Малку структура и многу слобода“

Лисабон е град во кој може да се ужива „од утринското кафе до последниот поглед кон реката“. Тој е идеален за патниците кои сакаат „малку структура и многу слобода“, се наведува во извештајот.

Ако го посетувате главниот град на Португалија, изберете ја населбата што сакате да ја истражите, резервирајте вечера и „препуштете им се на ридовите да ви го одредат патот“. Еден од најважните совети за посетителите е да одвојат време за уметноста, историското јадро на градот и уживањето во оброк без брзање, препорачува „European Best Destinations“.

„Уживање во секојдневните детали“

Копенхаген, кој го освои третото место на листата на најпосакувани градови за кратки патувања во 2027 година, „покажува зошто вреди да се помине викендот уживајќи во секојдневните детали на еден град“.

Главниот град на Данска претставува „многу привлечен избор“ за пријателите и паровите кои сакаат дизајн, ресторани во соседството и истражување на градот со велосипед.

„Неколку внимателно одбрани места можат да го обликуваат целиот ден, оставајќи доволно простор меѓу нив за уште едно кафе или одмор покрај водата“, се наведува во извештајот.