Освен времетраењето на спиењето, за здравјето е важно и колку време поминуваме во одделните фази на спиење, покажува голема студија објавена во научното списание „PLOS Medicine“.
Истражувачите од Пекиншкиот универзитет и Медицинскиот универзитет Капитал во Пекинг откриле дека подолгото траење на РЕМ-фазата на спиењето е поврзано со помал ризик од дури 83 болести.
Студијата опфатила 95.559 возрасни лица од британската база на податоци „UK Biobank“, со просечна возраст од 56 години. Учесниците седум дена и ноќи носеле нараквица со акцелерометар, а научниците ги анализирале фазите на спиење со помош на алгоритми за длабоко учење. Нивната здравствена состојба ја следеле во просек речиси девет години и анализирале повеќе од 1.000 болести.
Според резултатите, секои дополнителни 47,6 минути РЕМ-спиење биле поврзани со 26 отсто помал ризик од срцева слабост и 46 отсто помал ризик од деменција. Ризикот од паркинсонизам, односно збир на симптоми карактеристични за Паркинсоновата болест, бил помал за дури 80 отсто.
РЕМ е фаза на спиењето во која ги сонуваме најживописните соништа, а мозокот тогаш е многу активен.
Длабокото спиење било поврзано со помал ризик од седум здравствени состојби, меѓу кои се дијабетес тип 2, тешко депресивно растројство и Паркинсонова болест. Кога станува збор за Паркинсоновата болест, ризикот бил помал за 30 отсто.
Од друга страна, неправилниот ритам на спиење и подолгите периоди на будност во текот на ноќта истражувачите ги поврзале со поголем ризик од неколку здравствени состојби, вклучувајќи ја и анксиозноста.
Кога станува збор за времетраењето на спиењето, најмал ризик од 69 болести бил забележан кај лицата што спијат меѓу шест и осум часа. Спиењето пократко од пет часа било поврзано со поголем ризик од 37 болести.
„Одржувањето на времетраењето на спиењето меѓу шест и осум часа може ефикасно да го намали ризикот од бројни болести“, навеле авторите во соопштението за медиумите.
Сепак, истражувачите нагласуваат дека станува збор за опсервациска студија. Таа покажува поврзаност, но не докажува дека лошото спиење директно предизвикува болести. Одредени болести можат да го нарушат спиењето и години пред да бидат дијагностицирани.
Освен тоа, спиењето било мерено само во текот на една недела, со помош на уред што се носи на раката, а учесниците во британската база на податоци во просек се поздрави од општата популација.
