Сопствениците на англискиот гигант наводно размислуваат за продажба на клубот откако независната комисија на Премиер лигата утврдила дека Сити ги прекршил финансиските правила, тврди експертот за состојбите во Обединетите Арапски Емирати, Кристофер М. Дејвидсон.

Комисијата кон крајот на септември го прогласила Манчестер сити за виновен по речиси сите точки од обвинението – потврдени биле вкупно 114 од 115 наводи. Било утврдено дека клубот во периодот од 2009 до 2018 година користел спорни комерцијални аранжмани со кои, според наодите на комисијата, приходите биле вештачки зголемувани, а трошоците намалувани за повеќе од 900 милиони фунти.

Сопствениците пред голема одлука?

Токму тука Дејвидсон гледа можност за голем пресврт. Тој смета дека, доколку жалбата на Манчестер сити не биде успешна, сопствениците би можеле да одлучат да се повлечат од клубот.

Дејвидсон, автор на книга за Абу Даби и експерт за состојбите во ОАЕ, оценува дека пресудата би можела да се доживее како сериозен удар во политичка и културна смисла за владејачкото семејство на Абу Даби. Неговиот заклучок е дека продажбата би можела да биде начин да се стави крај на сè поголемиот проблем со угледот на сопствениците.

Во изјава за „The Athletic“, тој посочил дека, според неговото чувство, откако ќе се смират реакциите на пресудата, сопствениците би се „извлекле“ од целата приказна. Дури отишол дотаму што рекол дека не гледа сценарио во кое би продолжиле под вакви околности.

Она што ја прави оваа приказна уште поинтересна е фактот што претседателот на Манчестер сити, Калдун ал Мубарак, уште во јуни јасно порача дека шеикот Мансур нема намера да го продаде клубот.

Тогаш истакна дека Сити е долгорочна инвестиција и дека целта на сопственикот е да продолжи да го развива клубот. „Нема намера да се продава“, беше јасната порака на претседателот.

Сега, меѓутоа, ситуацијата е сосема поинаква. Пресудата на независната комисија го промени контекстот на целата приказна, а Сити веќе поднесе жалба и се обидува да ги оспори заклучоците на комисијата. Клубот инсистира на својата невиност и тврди дека одлуката содржи сериозни фактички и правни грешки.

Што ги чека граѓаните?

Казната засега не е одредена, а исходот од жалбената постапка би можел да биде клучен за понатамошниот развој на ситуацијата. Англиските медиуми веќе шпекулираат за можни сериозни спортски последици, додека во јавноста сè погласно се поставува и прашањето за иднината на сегашната сопственичка структура.

Едно е сигурно – Манчестер сити е во најголемата криза од доаѓањето на шеикот Мансур во 2008 година, а следните месеци би можеле да ја одредат иднината на клубот кој во меѓувреме стана еден од најмоќните во светскиот фудбал.