[ВИДЕО] „Соблечете ги дресовите, вие сте срам за државата!“ Хаос по новиот кикс на репрезентацијата – ги гаѓаа играчите со шишиња и жестоко ги навредуваа!

Фудбалската репрезентација на Тунис минува низ исклучително тежок период, а незадоволството на навивачите поради новиот кикс на националниот тим прерасна во вистински излив на бес.

Тунис на стадионот Хамади Агреби во Радес одигра само 2:2 против Боцвана во второто коло од квалификациите за Африканскиот куп на нации 2027, иако во второто полувреме имаше предност. По последниот судиски свиреж следуваа бурни реакции од трибините.

Според пишувањето на тамошните медиуми, дел од навивачите не избирале зборови.

„Соблечете ги дресовите, вие сте срам за државата“, „Срам да ви е“, „Безобразници“, се само дел од коментарите упатени кон туниските фудбалери.

Но, бесот не заврши само со повиците.

Некои навивачи почнаа да фрлаат празни шишиња кон репрезентативците, додека низ стадионот одекнуваа свирежи и негодување. Атмосферата стана исклучително напната, а сцените по натпреварот покажаа колку навивачите се незадоволни од резултатите на националниот тим.

Пораката беше јасна – трпението на навивачите е при крај.

Тунис уште на стартот од квалификациите одигра 1:1 против Уганда, а потоа против Боцвана повторно ја испушти победата. По две кола има само два бода.

А начинот на кој дојде до новото реми дополнително ги разбесни навивачите.

Боцвана поведе во 38. минута, но Хазем Мастури со два гола го сврте резултатот и му донесе предност на Тунис. Сепак, домаќинот не успеа да го сочува водството – Лебоганг Дитселе во 60. минута погоди за 2:2.

Тунис до крајот се обидуваше да стигне до трет гол. Елијас Ашури ја погоди стативата, имаше уште неколку шанси, но топката не сакаше во мрежата. Ниту во осумте минути судиско продолжение домаќинот не успеа да го пронајде патот до победата.

Така беше продолжена црната серија.

Тунис сега има осум натпревари без победа, што дополнително го зголемува притисокот врз селекторот Муин Шабани и репрезентативците.

Не помогна ниту тоа што Тунис пред почетокот на квалификациите се обиде да започне нова ера. Шабани повика неколку искусни фудбалери, меѓу кои Ферџани Саси, Аиса Лаидуни и Али Малул, додека шанса во репрезентацијата добија и неколку нови играчи. Претходно, селекцијата имаше исклучително лош настап на Светското првенство 2026, каде што ги загуби сите три натпревари.

Сега притисокот е уште поголем.

Навивачите го покажаа своето незадоволство веднаш по натпреварот, а сцените од трибините, шишињата што летаа кон играчите и свирежите беа јасна слика за атмосферата што моментално владее околу репрезентацијата.

Два натпревари, две ремија, осум натпревари без победа и сè помалку трпение на трибините.