Станува збор за шпанскиот механичар Хуан Хосе Ебенезер, кој на „TikTok“ има околу 300.000 следбеници и редовно објавува совети за купување и одржување автомобили.

Ебенезер смета дека при купувањето автомобил не е доволно да се гледа само цената. Подеднакво е важно колку е автомобилот сигурен, колку често завршува во сервис и колку долгорочно чини неговото одржување.

„Toyota“ е неговиот прв избор

На прашањето која марка во моментов ја смета за најсигурен избор, Ебенезер нема дилема – „Toyota“.

„Клучот е во нивните мотори“, порачува тој.

Според неговото искуство, автомобилите на „Toyota“ можат да бидат нешто поскапи од одредени модели на „Fiat“, „Dacia“ или „Renault“, а и оригиналните делови знаат да бидат поскапи.

Но, големата предност е во тоа што, како што тврди, овие автомобили многу ретко доаѓаат во сервис поради посериозни дефекти.

„Ако е мотор на ’Toyota‘, го препорачувам 100 проценти. Тоа се сигурни, безбедни и робусни мотори кои се покажуваат многу добро“, вели Ебенезер.

Што ако сакате поевтини поправки?

Механичарот притоа наведува и алтернатива за купувачите на кои им е поважно резервните делови и поправките да бидат подостапни.

Во тој случај, тој ги издвојува автомобилите од групацијата „Volkswagen“ и „Stellantis“.

„Не е исто, но обично имаат повеќе достапни и поевтини резервни делови. Оригиналните делови на ’Toyota‘ генерално се поскапи и поексклузивни“, објаснува тој.

Со други зборови, според неговото искуство, „Toyota“ би требало да понуди поголема механичка сигурност, додека некои европски производители можат да бидат поевтини кога сепак ќе дојде време за поправка.

Најевтиниот автомобил не е секогаш и најевтиниот избор

Ебенезер затоа предупредува на една од најчестите грешки при купување автомобил – да се гледа само почетната цена.

Автомобил кој при купувањето е поевтин за неколку илјади евра, долгорочно може да се покаже како поскап доколку почесто има потреба од поправки, резервни делови и работа во сервис.

Затоа тој ги советува купувачите, пред да донесат одлука, покрај цената, изгледот и опремата, да ги земат предвид и сигурноста на моторот и очекуваните трошоци за одржување.

Неговиот избор притоа е сосема јасен – ако приоритет му е автомобилот што поретко ќе завршува кај механичар, „Toyota“ е на врвот на листата.