Мередит, која се занимава со теми поврзани со здравјето и фитнесот, забележала дека консумирањето алкохол често ја наведувало и да внесува поголема количина преработена храна.

„Во текот на неделата многу дисциплинирано се придржував до исхраната, но забележував дека кога ќе пиев алкохол, на крајот ќе претерав со храната“, објаснила таа за „LADbible“. „Ми се јадеше преработена храна и шеќер, што само дополнително го поттикнуваше тој маѓепсан круг“.

Кога го забележала тој образец, одлучила да направи промена. Ги исфрлила алкохолот и рафинираниот шеќер, вклучително и засладените газирани пијалаци, колачите и слатките. Промената ја документирала на Инстаграм, каде што објавила фотографии за споредба на кои нејзиното лице изгледа значително помалку отечено и подефинирано.

Зошто се менува лицето?

Според „Healthline“, алкохолот може да предизвика отеченост на лицето како последица на дехидрација и проширување на крвните садови. Таквата реакција не се појавува само на лицето, туку и на останатиот дел од телото. Од друга страна, консумирањето слатки и бисквити може да предизвика нагло зголемување на нивото на шеќерот во крвта и да доведе до слични симптоми.

Односот кон шеќерот и алкохолот

Мередит истакнува дека исфрлањето на рафинираниот шеќер не значи дека мора да се храни еднолично. Таа и понатаму јаде овошје, при готвењето користи јаворов сируп, а во посебни прилики, како што се родендени, повремено јаде и нешто со преработен шеќер.

„Имав чувство дека преработениот шеќер ми создава голема зависност. Откако го исфрлив, се чувствувам многу подобро“, рекла таа.

Иако повремено си дозволува нешто слатко, кон алкохолот зазела многу построг став. Заклучила дека ѝ е полесно целосно да престане да пие отколку да се обидува само да ја намали количината.

„Веќе неколкупати се обидував да престанам да пијам, на пример на шест месеци или 30 дена“, објаснила таа. „Мислам дека поради таквиот начин на размислување и понатаму имав чувство дека многу сакам алкохол. Кога ќе го промените начинот на размислување и ќе сфатите дека тој всушност ништо не ви носи, многу е полесно целосно да го исфрлите“.

„Препознајте што навистина ви е потребно“

На оние кои размислуваат за исфрлање на алкохолот и преработените шеќери, Мередит им советува да се обидат да сфатат што во тој момент навистина сакаат или им е потребно. „Често со тоа само се обидуваме да прикриеме некоја подлабока потреба“, рекла таа, наведувајќи како пример дека желбата за шеќер може да биде последица на замор или недостиг на сон.

„Кога ќе го сфатите тоа, многу е полесно да препознаете што навистина ви е потребно и да ја замените таа навика со нешто што навистина ќе ја задоволи таа потреба, наместо само привремено да го прикриете проблемот“, заклучила таа.