Ексклузивни документи до кои дошол истражувачкиот канал „Prensa Iberica“ откриваат дека во текот на целиот Мундијал безбедносните служби секојдневно следеле терористички закани, вознемирување на фудбалерите, насилни навивачи и сите инциденти кои можеле да го загрозат најголемиот фудбалски настан во светот.

Во центарот на операцијата бил Меѓународниот центар за полициска соработка („MCPC“), во кој заедно работеле американски федерални агенти и полицајци од земјите учеснички на турнирот.

Меси бил главна цел на заканите

Според полициските извештаи, најголемиот број сериозни закани биле насочени кон Лионел Меси.

Еден од најалармантните инциденти се случил пред натпреварот меѓу Аргентина и Јордан во Далас, кога маж телефонски пријавил дека тој и уште две лица доаѓаат на стадионот вооружени со бомби и полуавтоматски пушки.

Во дојавата било наведено дека планираат напад врз полицијата и фудбалерите на двете репрезентации, но Лионел Меси бил посебно издвоен како главна цел.

Нова тревога следувала неколку дена подоцна, пред дуелот меѓу Аргентина и Египет во Атланта. Корисник на социјалната мрежа „X“ објавил дека планира да влезе на стадионот со четири бомби прицврстени на телото и да го нападне аргентинскиот капитен.

За време на истиот натпревар полицијата примила уште една дојава – маж тврдел дека поставил три експлозивни направи во кантите за отпадоци на стадионот. Поради тоа, објектот бил детално прегледан од експерти за експлозиви со помош на службени кучиња „K-9“.

Роналдо бил највознемируваниот фудбалер

Додека Меси бил најчестата цел на закани, Кристијано Роналдо се соочил со најголем број случаи на вознемирување.

Уште во средината на јуни, службеници на „FIFA“ пријавиле маж кој се обидувал да дознае каде е сместен португалскиот репрезентативец.

Полицијата во Хјустон го идентификувала и го уапсила само два дена подоцна во хотелот во кој престојувала репрезентацијата на Португалија.

Сличен инцидент се случил и во Торонто, каде што друг маж се обидел да влезе во лифт заедно со Роналдо. Обезбедувањето го спречило, а тој подоцна изјавил дека сакал само да се фотографира со славниот фудбалер.

Промашувањата на теренот предизвикувале смртни закани

Безбедносните извештаи покажуваат дека дури ни обичните грешки на теренот не поминувале без сериозни последици.

Норвешкиот репрезентативец Александер Серлот и неговата сопруга се нашле на мета на закани откако напаѓачот не му ја додал топката на Ерлинг Халанд во изгледна ситуација.

Слична судбина го снашла и колумбискиот репрезентативец Хамингтон Кампац поради промашување на првенството. Ситуацијата била толку сериозна што по завршувањето на Мундијалот тој не отпатувал дома заедно со остатокот од репрезентацијата.

На мета се нашол и францускиот дефанзивец Лукас Дињ, кој направил пенал на натпреварот меѓу Франција и Шпанија.

Судијата добил 6.000 заканувачки пораки

Најдраматичниот случај бил забележан кај францускиот судија Франсоа Летексје.

Неговото судење на натпреварот Аргентина – Египет предизвикало огромно незадоволство, а според извештаите на „MCPC“, судијата на својот приватен „WhatsApp“ добил дури 6.000 пораки со закани.

Повеќето пораки, како што се наведува во документите, пристигнале од граѓани на Египет незадоволни од одлуките што францускиот судија ги носел во текот на натпреварот.

Во текот на целото Светско првенство, „FBI“ ја координирал работата на Меѓународниот центар за полициска соработка, во кој учествувале претставници на повеќе безбедносни служби и полициски службеници од земјите учеснички.

Нивната задача била во реално време да ги следат сите безбедносни ризици – од терористички закани и вознемирување на фудбалерите до можни инциденти на стадионите.

Објавените документи покажуваат дека најголемата фудбалска смотра во светот била изложена на значително поголем безбедносен притисок отколку што јавноста можела да претпостави и дека бројни сериозни закани биле спречени пред да прераснат во вистински инциденти.