Долгоочекуваното музичко враќање на Ријана би можело да биде поблиску отколку што очекуваа нејзините обожаватели. Имено според нејзиниот партнер Асап Роки, пејачката се вратила во студиото и работи на нова музика.
За време на интервјуто во „Шоуто на Џејсон Ли“ (The Jason Lee Show), објавено во среда, 5 август, 37-годишниот рапер ги отфрли тврдењата дека нивната врска е причината зошто Ријана со години не објавила нов студиски албум.
Обожавателите честопати шпекулираа дека нивното семејство и бројните деловни проекти се причина за нејзиното отсуство од музичката сцена, но Роки тврди поинаку.
„Не. Токму сега е во студио. Да, го кажав тоа. Извини, душо. Брат, таа работи. Ќе имам проблеми поради ова“, рече раперот.
Неговата изјава претставува една од најголемите новости за новиот албум на Ријана во последните неколку години.
Последниот студиски албум на пејачката „ANTI“ беше издаден во 2016 година и помина две недели на врвот на Билборд 200, со хитови како „Work“, „Needed Me“ и „Love on the Brain“.
Иако не издаде нов студиски албум речиси 10 години, Ријана остана присутна во јавноста. Во 2023 година, таа настапи на полувремето од „Apple Music Super Bowl“, каде што изведе пресек од нејзините најголеми хитови, вклучувајќи ги „We Found Love“, „Diamonds“, „Work“ и „Umbrella“. За време на настапот, таа откри и дека е бремена по втор пат.
Покрај музиката, пејачката продолжи да ги развива своите брендови „Fenty Beauty“ и „Savage X Fenty“, додека во приватниот живот го прошири своето семејство. Таа и Роки го добија својот прв син, РЗА, во 2022 година, нивниот втор син, Рајот во 2023 година и нивната ќерка, Роки, во 2025 година.
Нејзиното последно музичко издание беше објавено во 2025 година, кога ја претстави песната „Friend of Mine“, која е на саундтракот за филмот „Штрумфови“ (Smurfs).
Пред тоа, таа ја издаде песната „Lift Me Up“ за филмот од 2022 година „Black Panther: Wakanda Forever“, за кој беше номинирана за Оскар во категоријата најдобра оригинална песна.
Пејачката неодамна повторно се појави на сцената. Имено во јули, таа му се придружи на Џеј-Зи за време на неговото шоу „Extra Innings“ на стадионот Јенки, каде што ги изведе песните „Run This Town“ и „Bitch Better Have My Money“.
