Нов трилер на Нетфликс полека ги освојува гледачите, а станува збор за шпанскиот филм „The Truthers“ („Los creyentes“), кој достигна четврто место на листата на најгледани филмови во светот кога станува збор за филмови на неанглиско говорно подрачје.
Филмот ја следи 30-годишната Рут (Стефани Магнин), која живее во Берлин и долго време немала блиски односи со своите родители. Откако нејзината мајка умира ненадејно и под сомнителни околности во нејзиниот роден град во Шпанија, Рут се враќа дома за да открие што се случило.
По пристигнувањето, го наоѓа својот татко Мартин (Хозе Коронадо), пензионер кој станал агресивен, повлечен и опседнат со теории на заговор. Ги поминува деновите заклучен во својата соба следејќи теории за фармацевтски компании, киднапирања и темни сили.
Мартин се однесува исклучително агресивно и чудно – веќе го избришал телефонскиот број на својата сопруга и е повеќе загрижен за исчезнувањето на едно локално момче отколку за смртта на сопствената сопруга. Поради ова, Рут почнува да се сомнева дека нејзиниот татко не е само „луд теоретичар на заговор“, туку дека е директно одговорен за смртта на нејзината мајка.
Филмот се искачува на топ-листите и моментално е рангиран на четвртото место на глобалната топ 10 листа на најгледани филмови на јазик различен од англискиот.
Кога станува збор за критичките рецензии, сè уште нема многу од нив, со оглед на тоа што филмот беше објавен на платформата на 24 јули, а повеќето досега го опишаа филмот како солиден генерички трилер кој го задржува вниманието на публиката, но не носи ништо револуционерно.
Хавиер Окања (Ел Паис) истакнува дека филмот „не измислува топла вода“ но е пристоен трилер за поширока публика чија најголема сила е самата тема – влијанието на теориите на заговор врз поединецот и семејството.
Публиката ја фали мрачната атмосфера, глумата (особено таткото и ќерката) и фактот дека неизвесноста го задржува вниманието на публиката до самиот крај.
Еден гледач на Ротен томатос тврди дека филмот е всушност пострашен од хорор-филм.
„Ова е длабоко вознемирувачки филм. Многу пострашен од кој било слешер филм или многу хорор филмови. Причината е затоа што ја одразува реалноста што се одвива пред нашите очи. Крајот е всушност прилично совршен во тој поглед, покажувајќи ја претстојната, подмолна опасност што лежи веднаш под површината на општествениот и политичкиот живот. Глумата е одлична. Заплетот е напнат и едноставен, што го прави разоткривањето на мистеријата уште повпечатливо“, истакна тој.
