Американскиот актер Џорџ Клуни и неговата сопруга Амал биле принудени да се евакуираат од својот дом во местото Брињол, на југот од Франција, поради шумски пожар што го зафати регионот Вар, пренесе БМФ ТВ.
Клуни, заедно со своите деветгодишни близнаци Александер и Ела, ја напуштил вилата во средата навечер, откако пожарот се проширил на околу 130 хектари земјиште, од кои приближно 100 хектари изгореле, додека повеќе од 600 луѓе биле принудени да ги напуштат своите домови.
Имено, парот ја потврдил веста за евакуацијата во писмо испратено до градоначалникот на Брињол, Дидие Бремон.
„Драг Дидие, во овој момент немаме никаква претстава дали нашиот прекрасен дом ќе ја преживее оваа страшна катастрофа“, напишале Џорџ и Амал Клуни.
Тие додале дека, додека го напуштаат Брињол, сакале да истакнат две важни работи.
„Пред сè, се надеваме дека вие и сите жители на нашиот град сте безбедни. Второ, Амал и јас сакаме да порачаме дека, без разлика што ќе му се случи на нашето село, ќе останеме дел од оваа заедница и ќе помогнеме во нејзината обнова. Го сакаме ова место и нашите пријатели кои живеат тука“, истакнале во писмото.
Претставниците на брачниот пар не сакале дополнително да ја коментираат ситуацијата.
Инаку, Џорџ (64) и Амал (48) поголемиот дел од годината го поминуваат на својата фарма во Франција, која претставува нивна главна резиденција. Освен тоа, поседуваат недвижности на езерото Комо во Италија, во американската сојузна држава Кентаки, како и во Англија.
Според податоците на Си-ен-ен, поради пожарите од регионот Прованса-Алпи-Азурен Брег биле евакуирани околу 3.000 луѓе, додека во францускиот регион Жиронд дури 224.000 жители биле принудени да ги напуштат своите домови.
Според АП, пожарот, кој пожарникарите сè уште не успеале да го стават под контрола, зафатил површина четири пати поголема од територијата на Париз.
Во интервју за магазинот „Esquire“ минатата година, Џорџ Клуни зборувал за животот што го изградил со сопругата во Франција, истакнувајќи дека се сметаат за многу среќни.
„Живееме на фарма во Франција. Голем дел од моето детство го поминав на фарма и тогаш таквиот живот не ми се допаѓаше. Но, за нашите деца тоа е сосема поинаку. Не поминуваат време со ајпеди, вечераат со возрасните и учат што значи одговорност. Имаат многу поквалитетно детство“, истакнал Клуни.
Актерот претходно зборувал и за тоа дека сака да ги заштити своите деца од прекумерното медиумско внимание и животот под рефлекторите на Холивуд.
„Не сакам да растат грижејќи се за папараците, ниту луѓето постојано да ги споредуваат со други познати деца“, рекол тој.
Кон крајот на 2025 година беше објавено дека Џорџ и Амал добиле француско државјанство.
Актерот во 2022 година на шеговит начин раскажал дека направил „голема грешка“ кога ги научил своите деца да зборуваат повеќе јазици, особено италијански, иако ниту тој ниту Амал не го зборуваат тој јазик.
„Ги научивме јазик што можат да го зборуваат, а ние да не разбираме што зборуваат. И двајцата немаме поим за што разговараат“, изјавил низ насмевка во емисијата „CBS Mornings“.
Нивните близнаци зборуваат англиски, француски и италијански јазик, а Клуни на шега додал дека „е од Кентаки, па англискиот практично му е втор јазик“.
Фото: Сан
