Дури и кога би можеле да се лекуваат сите останати знаци на стареење, овие мали „соматски мутации“ и понатаму постепено би ја намалувале способноста на нашето тело нормално да функционира. Научниците од „Skolkovo Institute of Science and Technology“ во Русија сега прецизно пресметале колку дополнителен живот би ни овозможило тоа.
Научниците тврдат дека ја откриле крајната граница на човечкиот животен век. Еден од клучните биолошки процеси поврзани со стареењето е натрупувањето на случајни мутации во нашата ДНК. Дури и кога би можеле да се лекуваат сите останати знаци на стареење, овие мали „соматски мутации“ и понатаму постепено би ја намалувале способноста на нашето тело да функционира. Научниците од „Skolkovo Institute of Science and Technology“ во Русија сега прецизно пресметале колку дополнителен живот би ни овозможило тоа. Лошата вест за ентузијастите кои сонуваат за долговечност е дека луѓето не можат да живеат вечно, дури и ако се измисли совршен лек против стареењето. Добрата вест е дека човечкиот животен век би можел значително да се продолжи. Просечниот човек во тој случај би живеел меѓу 150 и 190 години. Тоа е приближно двојно повеќе од просечниот животен век на луѓето кои денес живеат, на пример, во Обединетото Кралство, каде што тој изнесува 83 години за жените и 79 години за мажите. Истражувачите велат дека некои луѓе би можеле да живеат и значително подолго од тоа. На биолошко ниво, овие процеси се движат од скратување на теломерите, заштитните капи на нашите ДНК нишки, па сè до губење на способноста клетките да се ослободуваат од отпадните материи. Истражувачите првично немале намера да ја утврдат крајната граница на човечкиот животен век, туку да пронајдат начин за мерење на тоа како сите овие процеси придонесуваат за стареењето, пишува „Daily Mail“.
Она што го откриле е дека еден неизбежен процес ќе стави крај на нашиот живот, дури и ако секој друг знак на стареење стане излечив. Тој процес е натрупувањето на соматски мутации, мали грешки што можат да се појават во нашата ДНК секојпат кога една клетка се дели. Нашите клетки се многу ефикасни во препознавањето и поправката на овие грешки, но не се совршени. Повеќето од овие мутации се целосно безопасни, но понекогаш можат да доведат до опасни промени кои предизвикуваат рак. Самите карциноми можат да бидат смртоносни, но дури и кога медицината би можела целосно да го држи ракот под контрола, самите мутации на крајот би станале фатални.
Откако соматските мутации ќе се натрупаат до одредено ниво, тие почнуваат да го нарушуваат функционирањето на клетките. Постепено ги оштетуваат нашите ткива и на крајот доведуваат до откажување на органите. Главниот автор на истражувањето, Дмитриј Криуков, го поставил прашањето: „Колкав би бил животниот век на човек кој ги надминал сите механизми на стареење, освен соматските мутации?“
„Изградивме модел на човечко стареење кој е поттикнат исклучиво од соматски мутации. Нашиот модел проценува како овој процес самостојно влијае врз животниот век, така што постепено го намалува бројот на клетки во ткивата“, вели Криуков.
Доколку медицината би можела да лекува сè, освен овие соматски мутации, просечниот животен век би се движел меѓу 146 и 194 години, во зависност од моделот што се користи. „Но, тоа покажува дека соматските мутации, иако изненадувачки слаб самостоен двигател на стареењето, можат да станат клучен фактор кога ќе се комбинираат со другите механизми“, додава тој.
Истражувачите не очекуваат дека луѓето наскоро ќе почнат да живеат толку долго. Сепак, нивните податоци покажуваат неколку области каде што третманите би можеле да бидат најефикасни. Клетките во кожата и црниот дроб постојано ги заменуваат старите клетки со нови и можат да го одржуваат тој процес на обновување многу долго време. Клетките во срцето и мозокот, од друга страна, во најголем дел не можат да се заменат, па со текот на годините продолжуваат да акумулираат мутации.
Ова би можело да претставува разочарување за научниците и претприемачите кои се обидуваат да ги откријат тајните на бесмртноста. Претходно оваа година американскиот стартап „Life Biosciences“ го доби првото одобрение од „FDA“ за спроведување клиничко испитување врз луѓе, со цел да се истражи можноста за делумно подмладување. Во рамките на истражувањето, научниците ќе се обидат да го вратат биолошкиот часовник на оштетените клетки во окото, со што би ги подмладиле ткивата и би им ја вратиле нивната функција.
