Ако мислевте дека телефоните со T9 тастатура заминаа во историјата, овој евтин теренски телефон со нереално долго траење на батеријата ќе ве натера повторно да размислите.
Компанијата „HMD“ го претстави „Nokia 123 Shield“, исклучително достапен класичен телефон со физичка T9 тастатура, кој е создаден да издржи тешки работни услови на терен, како и дожд, песок и прашина.
Телефонот официјално го исполнува стандардот IP65 за отпорност на вода и прашина. Куќиштето е дизајнирано за работа на отворено, со гумени страни што спречуваат лизгање од рацете и заштитни капачиња што ги штитат приклучоците за полначот и слушалките.
Производителот особено истакнува подобар прием на сигналот во споредба со постарите модели, како што е „Nokia 105“, што овозможува почист звук и постабилни разговори дури и на места каде што мрежниот сигнал е послаб.
Уредот има екран со дијагонала од 2,4 инчи, додека на задната страна се наоѓа скромна камера со исклучително силна LED-светилка, трипати посилна во споредба со онаа кај моделот „Nokia 110“.
Внатрешната меморија од 4 MB е речиси неупотреблива, но добрата вест е што може да се прошири со microSD-картичка до 32 GB, што е сосема доволно за складирање музика.
Сепак, најголемата предност на овој модел е неговата заменлива батерија со капацитет од 1.750 mAh, која се полни преку современиот USB-C приклучок. Едно полнење овозможува до 19 дена работа во режим на мирување или речиси 28 часа непрекинат разговор.
Телефонот поддржува две SIM-картички, има класичен приклучок за слушалки и FM-радио што функционира без потреба од приклучување кабел.
„Nokia 123 Shield“ пристигнува во зелена и виолетова боја. Иако сè уште не е познато дали ќе се појави во Македонија, овој модел веќе е достапен во некои земји од регионот, каде што се продава по цена од 35 до 40 евра.
