Светскиот фудбал е потресен од веста за смртта на поранешниот капитен и селектор на англиската репрезентација и еден од најголемите фудбалери во историјата на Ливерпул и Њукасл.

Киген почина по битка со ракот на желудникот, кој кај него бил откриен во четврта фаза, односно кога болеста веќе се проширила на други делови од телото. Неговото семејство на почетокот на годината соопшти дека бил примен во болница поради долготрајни тегоби со желудникот, по што прегледите покажале дека боледува од рак.

„Кевин неодамна беше примен во болница за дополнителни испитувања поради долготрајни тегоби во стомакот. Испитувањата открија дека има рак, поради што ќе биде подложен на лекување. Тој му е благодарен на медицинскиот тим за интервенцијата и континуираната грижа“, соопшти тогаш неговото семејство.

Неколку месеци подоцна, Киген откри дека болеста достигнала четврта фаза и дека прима нова терапија.

„Ми предложија нова терапија која има успешност од 33 проценти. Очекував поголем процент, но сè уште сум тука“, изјавил тогаш Киген, задржувајќи го оптимизмот и покрај тешката дијагноза.

Симптоми на рак на желудникот

Ракот на желудникот во почетната фаза често не предизвикува јасни симптоми. Дури и најчестите знаци, како што се болка во стомакот и необјаснето губење на телесната тежина, неретко се појавуваат дури кога болеста е во напредна фаза, наведува Кливленд клиниката.

Симптомите на рак на желудникот можат да вклучуваат:

❗губење на апетит,

❗отежнато голтање,

❗замор и слабост,

❗мачнина и повраќање,

❗необјаснето губење на телесната тежина,

❗горушица и проблеми со дигестијата,

❗црна столица или повраќање крв,

❗надуеност и зголемено создавање гасови по оброк,

❗болка во горниот дел од стомакот,

❗чувство на ситост по многу мала количина храна.

Проблемот е што многу од овие симптоми можат да се појават и кај значително помалку сериозни состојби, како што се гастритис, рефлукс или нарушувања на дигестијата. Поради тоа, луѓето често ги игнорираат или се обидуваат сами да ги ублажат, без да побараат лекарска помош.

Повремената горушица или надуеност најчесто не се знак за рак, но симптомите кои траат подолго време, се влошуваат или се јавуваат заедно со губење на телесната тежина, крвавење, отежнато голтање или упорна болка во стомакот треба да бидат проверени од лекар.

Раното откривање на болеста може значително да ги подобри можностите за успешно лекување, поради што долготрајните и необјаснети тегоби не треба да се игнорираат.