Скриен високо во крошните на дождовните шуми во Демократска Република Конго, необичен мајмун со впечатливи розово-портокалови усни со децении им избегнувал на научниците. По долгогодишни истражувања, експертите потврдија дека станува збор за досега непознат вид, само петтиот нов вид африкански мајмун откриен во последните 75 години.
Мајмунот, препознатлив по своите розово-портокалови усни, црното лице и темното крзно, кој живее во дождовните шуми на Демократска Република Конго, официјално е потврден како нов вид во науката.
Истражувачите првпат го забележале и фотографирале овој примат високо во крошните на густите тропски шуми во Националниот парк Ломами, сместен во централно-источниот дел на земјата.
Чуварите на природата кои работат во ова подрачје уште во 2008 година првпат пријавиле средба со ова необично животно, но тогаш успеале да направат само една заматена фотографија.
Дури по новото забележување десет години подоцна, меѓународен тим научници започнал обемно истражување за да го пронајде и проучи мистериозниот примат. Нивната работа потврдила дека станува збор за досега непознат вид.
Ова е само петтиот нов вид африкански мајмун откриен во последните 75 години.
Една од водечките улоги во истражувањето имал Џуниор Амбоко, докторанд на Универзитетот Флорида Атлантик. Потрагата по новиот вид вклучувала снимање на огласувањето на животните, фотографирање и детални генетски анализи.
Резултатите од истражувањето се објавени во угледното научно списание „PLoS One“.
Амбоко за „BBC News“ изјавил дека било неверојатно чувство да се гледа во лицето на животно за кое толку малку луѓе воопшто знаеле дека постои.
Во научна смисла, откривањето на нов вид значи негово официјално опишување и потврда дека во текот на еволуцијата генетски се развил како посебен вид.
Иако науката дури сега официјално го опиша ова животно, локалното население одамна знаело за неговото постоење и го нарекува Ликвели.
Сепак, Амбоко истакнува дека овие мајмуни се исклучително плашливи и најголемиот дел од времето го поминуваат криејќи се високо во крошните на дрвјата.
„За време на истражувањето разговаравме со жителите на 52 села во близина на нивното живеалиште, но само луѓето од осум села рекоа дека некогаш ги виделе“, се присети тој.
Меѓународниот истражувачки тим, составен од научници од Демократска Република Конго, Соединетите Американски Држави и Германија, на новиот вид му го додели латинското име Colobus congoensis, во чест на исклучителната природна разновидност на Конго.
Новиот вид припаѓа на групата колобуси, африкански мајмуни познати по тоа што немаат палци.
„Станува збор за исклучително важни африкански примати кои немаат палци“, објасни професорката Кејт Детвајлер од Универзитетот Флорида Атлантик.
„Тие се тревојади кои живеат во крошните на шумите и имаат клучна улога во зачувувањето на шумскиот екосистем. Сметаме дека значително придонесуваат за распространување на семињата и го поттикнуваат нивното ’ртење, со што учествуваат во природната обнова на шумите.“
Професорката Детвајлер смета дека нивните необично впечатливи ознаки на лицето најверојатно служат како визуелен сигнал за другите единки од истиот вид.
Можно е тие да имаат важна улога во привлекувањето партнери за време на сезоната на парење или да овозможуваат меѓусебно препознавање.
Овие мајмуни се одликуваат и со карактеристично длабоко огласување, кое потсетува на рикање.
„Често можете да ги слушнете, но многу тешко е да ги видите“, рече Амбоко.
Научниците веруваат дека станува збор за редок вид, чија распространетост е ограничена на мал дел од шумата каде што наоѓа соодветно живеалиште и доволно храна за опстанок.
Бидејќи овие мајмуни се ловат поради нивното месо, истражувачите се надеваат дека нивното официјално признавање како посебен вид, Colobus congoensis, ќе го отвори патот за нивна законска заштита.
Тие нагласуваат дека допрва претстои многу работа, бидејќи за овој мистериозен вид сè уште знаат многу малку.
Во план се нови теренски истражувања, со кои сакаат да ја проценат бројноста на популацијата и подетално да ги проучат неговото однесување, начинот на живот и потребите за зачувување.
