Индонезија воведе построги визни правила со кои сака да стави крај на странските инфлуенсери и креатори на содржини кои работат на Бали користејќи туристички визи. Според новите правила, лицата кои објавуваат содржини на интернет со цел заработка, спонзорства или промоција на производи ги прекршуваат условите на туристичкиот престој – дури и ако објавите ги објават откако ќе ја напуштат земјата, пишува „New York Post“.
Засилен надзор на социјалните мрежи
Индонезиските власти значително го засилија надзорот врз странците на Бали, а имиграциската патрола "Dharma Dewata" веќе приведе десетици лица поради прекршување на визните правила. Службениците ги следат и активностите на социјалните мрежи, а редовно ги посетуваат и популарните места каде што се собираат странци, како Чангу и Убуд, објави „Bali Info“.
На прекршителите им се закануваат парични казни, депортација, но и можност за трајна забрана за влез во Индонезија. Австралиското Министерство за надворешни работи преку платформата „SmartTraveller“ ги предупреди патниците дека за какви било деловни активности на Бали мора да поседуваат соодветна работна виза.
Кога инфлуенсерот всушност „работи“?
Едно од главните прашања меѓу патниците е што точно се смета за работа. Индонезиската имиграциска служба појасни дека работењето со туристичка виза е една од најчестите причини поради кои странците се депортираат од Бали.
„Не мора секогаш да станува збор за платена работа. Имиграциските власти можат да ја земат предвид целта на престојот, видот на активностите и дали зад нив постои некаква економска корист“, соопштија властите.
Како работа можат да се сметаат различни активности – од професионални услуги како фотографирање и шминкање, па сè до промоција на производи и рекламирање на социјалните мрежи. Правилата важат и за активности кои не се директно платени, но носат друга корист, како што се бесплатно сместување, производи или соработки со брендови.
„Незаконски е да работите, да спроведувате истражувања или да волонтирате доколку престојувате во земјата со туристичка виза. Осигурете се дека поседувате соодветна виза за активностите што планирате да ги извршувате“, предупредија властите.
Целта е заштита на туризмот на Бали
Индонезиските официјални претставници тврдат дека засилениот надзор не е насочен против туристите, туку против оние кои ги користат туристичките визи за деловни активности.
Фелусија Сенгки Ратна, раководител на регионалната канцеларија на Дирекцијата за имиграција за Бали, изјави дека контролите се спроведуваат со цел да се зачуваат безбедноста и стабилноста на островот.
„Овој надзор се спроведува сеопфатно за да се одржат безбедноста и стабилноста“, изјави таа.
Поради тоа, властите ги советуваат инфлуенсерите, дигиталните номади и другите креатори на содржини пред да пристигнат на Бали внимателно да проверат дали нивната виза одговара на активностите што планираат да ги извршуваат.
