Мозочниот удар е итна и животозагрозувачка медицинска состојба која настанува кога ќе се прекине дотокот на крв до дел од мозокот, што доведува до изумирање на мозочните клетки. Последиците можат да бидат трајни и сериозни, влијаејќи врз говорот, подвижноста и севкупниот квалитет на животот. Токму затоа советите на стручните лица за превенција се од исклучително значење.

Д-р Баибинг Чен, невролог, лекар-научник и биостатистичар со двојна специјалистичка сертификација, кој на социјалните мрежи споделува совети за здравјето на мозокот, од лично клиничко искуство видел како навидум безопасните секојдневни навики можат да доведат до катастрофални последици.

Врз основа на своето долгогодишно искуство, д-р Чен, познат и како „Dr. Bing“, издвои три активности што лично ги избегнува за да го намали ризикот од мозочен удар, а препорачува и другите да го следат неговиот пример. Неговите предупредувања, кои на „TikTok“ се прегледани повеќе од пет милиони пати, изненадија многумина, бидејќи се однесуваат на активности што често се сметаат за здрави или барем безопасни.

Енергетските пијалаци се први на листата

Првата работа што никогаш не ја консумира се енергетските пијалаци. Иако многумина ги користат за брзо зголемување на енергијата, д-р Чен вели дека самиот се придржува само до обично кафе наутро.

Тој објаснува дека голем број енергетски пијалаци содржат екстремно високи количини кофеин, кои често ја надминуваат препорачаната дневна граница за повеќето возрасни лица.

Проблемот, сепак, не завршува со кофеинот. Овие пијалаци често содржат и други стимуланси, како гуарана, која претставува дополнителен извор на кофеин, како и таурин, кој може дополнително да го засили дејството на стимулансите.

Таквата комбинација, предупредува д-р Чен, може сериозно да ја наруши способноста на крвните садови нормално да се регулираат и значително да го зголеми ризикот од опасни срцеви аритмии.

Неправилниот срцев ритам може да доведе до создавање крвни згрутчувања, а доколку тие преку крвотокот стигнат до мозокот, последица може да биде исхемичен мозочен удар.

Покрај овој директен ризик, д-р Чен предупредува и на уште една, помалку позната опасност – прекумерните количини витамин Б, кои често се додаваат во енергетските пијалаци, со текот на времето можат да предизвикаат оштетување на нервите.

Никогаш не крева максимални тежини со задржан здив

Втората навика што ја избегнува е поврзана со тренингот со тегови.

Иако физичката активност е исклучително важна за здравјето, одредени техники можат да бидат контрапродуктивни, па дури и опасни.

„Не правам максимални повторувања, односно не ја кревам најголемата тежина што можам да ја подигнам само еднаш и никогаш не кревам тешки тегови додека го задржувам здивот“, објаснува д-р Чен.

Оваа техника, позната како Валсалвин маневар, предизвикува нагло и екстремно зголемување на систолниот крвен притисок, кој понекогаш може да надмине и 400 mmHg.

Таквиот огромен и ненадеен притисок претставува сериозен удар врз крвните садови во мозокот.

Д-р Чен вели дека во својата практика видел случаи во кои токму ова довело до крварење во мозокот, состојба што понекогаш се нарекува и „мозочен удар кај кревачите на тегови“.

Наместо тоа, тој препорачува тренинг со контролирано дишење, при што треба да се издишува во моментот на најголем напор, како и користење нешто помали тежини со повеќе повторувања.

На тој начин, може да се изгради значителна сила без мозокот да биде изложен на екстремни скокови на крвниот притисок.

Внимавајте на положбата на вратот при јога

Последното предупредување се однесува на јогата, практика која е широко ценета поради бројните придобивки за телото и умот.

Д-р Чен веднаш нагласува дека јогата генерално е одлична за здравјето, но проблемот лежи во специфичните пози кои го доведуваат вратот во екстремни положби.

Конкретно, ризик претставуваат позициите што предизвикуваат екстремна хиперекстензија (претерано наведнување наназад) или хиперфлексија (претерано наведнување нанапред) на вратот.

Во ретки, но документирани случаи, ваквите движења можат да доведат до дисекција, медицински термин за раскинување или расцеп на ѕидот на крвниот сад во вратот.

Таквото оштетување на артеријата може да предизвика создавање крвно згрутчување, кој потоа може да доведе до мозочен удар.

Поради тоа, неврологот им советува на сите што практикуваат јога внимателно да внимаваат на положбата на својот врат и да избегнуваат какво било екстремно напрегање во тој чувствителен дел од телото.

Според него, внимателноста и умереноста се клучот за безбедно и корисно практикување на јогата.