Овој 79-годишен актер изјави дека Алцхајмеровата болест му била дијагностицирана кратко откако во 2022 година доби почесен Оскар, хуманитарна награда за неговиот активизам во областа на социјалната правда и човековите права.

„Би можел да живеам со тоа, во извесна смисла“, рече Гловер, но додаде: „Сигурен сум дека, како што болеста ќе напредува, работите ќе стануваат поинакви и ќе се менуваат“.

Гловер рече дека неговите движења, говорот и помнењето се забавиле од поставувањето на дијагнозата, но дека и понатаму е активен во заедницата во Сан Франциско и дека ја има поддршката од своето семејство.

„Тие ми го чуваат грбот“, рече тој. Актерот и неговото семејство соработуваат со Здружението за Алцхајмерова болест со цел да ја подигнат свеста и да ги едуцираат Американците за борбата против оваа болест.

„Мислам дека за него е навистина важно да има контрола над сопствениот наратив, над својата животна приказна“, изјави ќерката на Гловер, Мандиса.

„Тоа е навистина важно. И моментот е сега. Кога би имало подобар момент од сега тој да зборува во свое име? Тоа е важно затоа што луѓето понекогаш поставуваат прашања, а јас не сакам да бидам неискрена личност и да велам: ‘О, да, сè е во ред. Сè е одлично’“.

Што е Алцхајмерова болест?

Алцхајмеровата болест е вид деменција што влијае врз помнењето, размислувањето и однесувањето, наведува Здружението за Алцхајмерова болест. Алцхајмеровата болест е прогресивна и смртоносна болест која постепено се влошува, од раните фази на губење на помнењето до неможност за водење разговор.

Потешките симптоми вклучуваат „дезориентираност, промени во расположението и однесувањето; сè подлабока збунетост во врска со настаните, времето и местото; неосновани сомнежи кон семејството, пријателите и професионалните негуватели; посериозно губење на помнењето и промени во однесувањето; како и потешкотии при говорот, голтањето и одењето“. Темнокожите луѓе имаат двојно поголема веројатност да им биде дијагностицирана Алцхајмерова болест или друг облик на деменција во споредба со белците.

Во просек, лицата со Алцхајмерова болест живеат од четири до осум години по поставувањето на дијагнозата, но можат да живеат и до 20 години.

Возраста е најголемиот фактор на ризик за Алцхајмеровата болест: повеќето луѓе што ја имаат се на возраст од 65 години и повеќе. Ако болеста му биде дијагностицирана на лице помладо од 65 години, тоа се смета за Алцхајмерова болест со ран почеток.