Ако некогаш сте сонувале за дом што можете да го сместите каде што сакате, кој не бара поврзување со електричната мрежа, не носи месечни сметки за струја и чини помалку од 7.000 евра, компанијата „Тесла“ смисли токму таква идеја и започна бројни дискусии за иднината на домувањето.

Имено, малата куќа на „Тесла“ е мала мобилна куќа на сончева енергија, замислена како целосно енергетски независна куќа по цена пониска од просечниот скутер. Проценетата вредност на проектот е околу 8.000 американски долари, или приближно 6.800 евра.

Без сметка за струја

На хартија, идејата изгледа како почеток на нова ера на одржлив живот. Куќа без поврзување со мрежата, без месечни сметки за струја и без зависност од централизирани системи звучи како сон што се остварува за многу љубители на минималистичкиот и самоодржлив начин на живот. Сепак, во пракса, овој концепт отвора повеќе прашања отколку што нуди конкретни одговори.

Малата куќа на „Тесла“ треба да ги комбинира клучните технологии по кои е позната компанијата: соларни панели, системи за батерии „Powerwall“ и интелигентно управување со енергијата преку мобилна апликација. Концептот е претставен како визија за иднината во која луѓето би можеле да живеат целосно надвор од електричната мрежа, потпирајќи се исклучиво на сопственото производство на енергија.

Засега нема планови за масовно производство

Внатрешноста на куќата ја следи филозофијата на минимализмот. Изработена е од рециклирани материјали, а распоредот на собите е внимателно дизајниран за да се искористи максимално секој сантиметар од просторот. Дневната соба, кујната и просторијата за спиење се наоѓаат на помалку од 20 квадратни метри.

Благодарение на мобилната конструкција, куќата може релативно лесно да се транспортира и постави на различни локации, што ја прави привлечна опција за секој што сонува за живот поблиску до природата и подалеку од урбаните ограничувања.

Идејата за малата куќа на „Тесла“ потекнува од демонстративен проект презентиран во Австралија во 2017 година.

Сепак, и покрај големиот јавен интерес, оттогаш не се објавени сигурни информации што би потврдиле дека проектот некогаш влегол во фаза на масовно производство. Фотографии и референци за малата куќа на „Тесла“ сè уште може да се најдат во некои од промотивните материјали на „Тесла“, но засега нема официјални најави, опции за нарачка или конкретни планови за комерцијализација на овој производ.