Босанскиот авантурист Роберт Дацешин откри една од најнеобичните работи што ги слушнал за време на патувањето низ Источна Африка – дека жените не би требало да свиркаат навечер во одредени земји на овој континент.
„Луѓе, јас во моментов се наоѓам во Уганда, а дали знаевте дека овде, според верувањето, жените не би смееле да свиркаат и дека постојат неколку причини за тоа? Пред сè, свиркањето ноќе се смета за повикување зли духови и лоши појави. Доколку жена свирка навечер, би можела да привлече лоши работи кон своето семејство, па дури и нејзе да ѝ се случи нешто“, објаснил тој.
Потоа додал дека се верува оти со свиркање преку ден може да се привлечат змии, па затоа и тоа се избегнува.
„Целиот концепт на свиркањето е нешто што овде го практикуваат мажите или сточарите, кои на тој начин ги повикуваат своите крави, кози и овци. Поради тоа се смета дека една жена, за да остане дама, воопшто не би требало да свирка“, додал тој.
Тој нагласил дека ова не е нешто пропишано со закон, туку локално верување што навистина го почитуваат голем број млади, но и повозрасни девојки.
Во традиционалните општества од жените често се очекувало „скромно“ и тивко однесување, па гласното свиркање се сметало за непристојно. Постојат и локални изреки и митови, на пример дека жена која свирка нема да има среќа во љубовта или бракот, но за тоа, секако, нема никакви докази.
