Додека многумина бараат начини да го освежат изгледот и визуелно да ги подигнат цртите на лицето со шминка, фризерите веќе извесно време користат техника која може да го постигне токму тој ефект, и тоа без филери, ботокс и какви било естетски процедури.

Станува збор за таканаречената „French Face Lift“ фризура, односно техниката на потстрижување „француски фејслифтинг“, која е осмислена така што на косата ѝ дава повеќе волумен, а на лицето ефект на подмладување.

За разлика од класичните методи на потстрижување кои се засноваат на поделба на косата на делови, оваа техника тргнува од обликот на лицето и природната структура на косата. Целта е да се постигне повеќе движење во косата, да се зголеми волуменот таму каде што е потребно и да се нагласат најубавите црти на лицето.

„Кога потстрижуваме на тој начин, стануваме архитекти за коса“, објаснува фризерот Закари Џардин, кој повеќе од 15 години работел во некои од најпознатите салони во Париз.

Според него, техниката „француски фејслифтинг“ се заснова на аглите, пропорциите и волуменот.

„Ваквото потстрижување секогаш носи голема трансформација. Французинките многу добро разбираат колку е важен волуменот кога станува збор за косата, па често избираат пократки и поструктурирани фризури кои ги нагласуваат нивните природни црти и го создаваат оној ненаметливо шик изглед по кој се препознатливи“, вели Џардин.

Ефект на подигнати јагодици

Една од најголемите предности на оваа техника е тоа што може да се приспособи на секој облик на лице, што значи дека секој може да ги искористи нејзините предности. Кога се правилно распоредени, слоевите создаваат впечаток на поистакнати јагодици и позатегнати контури на лицето.

„Особено е корисна за жените во позрелите години, чија коса почнува да го губи волуменот и паѓа покрај лицето како завеси, што често може да придонесе за поуморен изглед. Исто така е одличен избор за лица со проретчена коса, бидејќи со посебниот начин на потстрижување се создава впечаток на поголема густина и се зголемува волуменот таму каде што недостасува“, објаснува Џардин.

Бојата дополнително го засилува ефектот

Експертите истакнуваат дека ефектот на „францускиот фејслифтинг“ може дополнително да се нагласи со внимателно поставени прамени или со техниката балајаж. Поточно, кога посветлите тонови се распоредени околу лицето, косата добива поголема длабочина, а тенот изгледа посвежо и поблескаво.

Затоа „францускиот фејслифтинг“ моментално се смета за една од најбараните фризерски техники меѓу жените кои сакаат модерна фризура што подмладува, но истовремено изгледа природно и лесно се одржува.

Тој е многу популарен бидејќи ја користи природната текстура на косата наместо да се бори против неа, па косата потстрижена на овој начин лесно се обликува во текот на летото.