Реката Шала, која се наоѓа во северна Албанија, привлекува сè повеќе туристи благодарение на својата тиркизна, чиста вода и пејзажот со кој е опкружена. Ја нарекуваат Тајланд на Европа.
Албанија стана популарна дестинација за поевтино патување. Покрај Ривиерата со места како Ксамил и Саранда, вниманието го привлекуваат и помалку познатите предели. Еден од нив е Луми и Шалеш, скриен залив на Шала. Видеата од Луми и Шалеш ги преплавија социјалните мрежи.
Патничката блогерка Ели, која го пишува блогот „The Ginger Wanderlust“, изјави дека Луми и Шалеш е едно од најубавите места во Албанија и го нарече врв на нејзиното патување.
До Луми и Шалеш може да се стигне со еднодневно патување од Тирана или блискиот Скадар. Од главниот град, потребно е да се организира екскурзија и да се смета на четиричасовно возење, додека од Скадар, патувањето започнува со минибус до езерото Коман во траење од околу 90 минути, по што следи едночасовно возење со брод до самиот залив.
Поради недоволно развиената инфраструктура, патувањето може да биде напорно, а во лето, кога нивото на водата во реката се намалува, посетителите понекогаш мора да преминуваат делови од речното корито пеш.
На бреговите на Луми и Шалеш има рачно изработени дрвени мостови кои поврзуваат неколку сместувачки капацитети.
Во врвот на туристичката сезона, таму можете да преноќите за 40 евра. Дневните посетители можат да изнајмат лежалки и чадори, а се нудат и активности како што се зиплајни, нуркање, кајакарење и планинарење.
